A tawpah TBL chungnung

Mizoram Super League team ṭha pahnih inkhelah Khatla TBL an chungnung. TBL hian hun tawp dawna K. Lalthianghlima point 2 hnih hmangin champion lai Zarkawt BCA chu 77-76 in an hneh.

MSL table-ah erawh BCA an la chungnung zawk, point 16 ve ve neih mah se an pahnih intawn tawhnaah BCA hian record an nei ṭha zawk. An inkhelh hmasaka an chakna point chu, tuna an tlawmna point aia a tam zawk vang a ni.

Nilaini zan R. Dengṭhuama Stadium, Mualpuia inkhel a hmuhnawm takzet. Hun tawp nan second 40 chauh a awm tawh - Khatla TBL lamin point khatin hma an la hruai. Hun khawhral an tumna lamah Vanlalṭhazuala'n turn over a nei palh.

BCA lamin vaw let nghalin, an player ṭha Matthew Remtluanga Sailo chuan free throw vawi hnih a hlawh chhuak, lut ve vein Zarkawt team hi point khatin hma a hruaipui daih, hetihlai hian hun tawp nan second 20 chauh a awm tawh.

Khatla TBL coach Vanlalnunsanga'n time out a ko. An ruahman ang vek erawh chuan a kal bik chuang lo, point neih an tum hmasak an hloh - buai nuaih karah K. Lalthianghlima chuan ball a rawn chang nawlh, hun tawp rualin basket a rawn neih chu chak nan a tawk.

Champion lai BCA hian an league round hnuhnung ber atan zaninah Tuikual South an hmachhawn leh dawn, hmahruaitu ni tlang turin chak a pawimawh. Inrinni zanah TBL-in Chanmari Vikings an hmachhawn ve leh thung dawn a ni.

Nilaini zan inkhel dangah Mission Veng Hotshots chuan Chawnpui chu 102-61 in an sawp. Mizorama basketball inelna sang ber an khelh hmasak berah Hotshot an mikhual lo hle, nizan khan an league match tawp ber atan Vikings an hmachhawn a, result erawh kan hre hman lo.