Pafain an inlan leh dawn

Vawiin chhun dar 12:00 hian RG Stadium-ah Sakawrdai VC leh Chaltlang LC te an inkhel dawn a, group B inkhel turah hian Sakawrdai tan hian Lalfelpuia leh a fapa Israel Laltlanhlua te an tel.

ADFA Cup 2022, Maryrs Trophy 2022 leh MLA Cup 2022-ah Sakawrdai Zone FA, Sakawrdai GSA leh Sakawrdai VC aiawhin Lalfelpuia-te pafa an lo khel dun tawh a ni.

Lalfelpuia hi kum 38 mi a ni a, Sakawrdai captain niin centre back a ni. A fapa Israel-a pawh defender tho a ni a, right back a ni thung. Israel-a hi kuminah kum 16 a ni chauh dawn a, Khumtung 6-0 a an hneh ṭumah pawh khan second half-ah lutin a pa nen hian an khel dun.

Sakawrdai coach Lalawmpuia Khawlhring chuan, "An pafa chuan inkhel bul an ṭan dawn lo a, second half-ah erawh an khel dun leh ang. Tun hnaiah tournament kan khel tam a, kan fitness a ṭha. Chaltlang hi eng ang chiaha ṭha nge tih hre lo mah ila kan inringtawk ve hle," tiin Vanglaini a hrilh.