Team ṭha Salem Veng khingpui tur Mualpheng

Salem Vengin team enkawl turin coach atan Lalrindika Hmar an lalut a, match hmasa berah Serkhan VC 11-0 in an sawp. Vawiin chhun dar 12:30 hian Salem Veng an inlan leh dawn a, Ramthar Veng hnehtu Mualpheng an hmachhawn ang.

Salem hian MPL-a tawn-hriat nei ṭha Joseph Lalnunpuia leh David Lalchhuanawma-te bakah MPL Under 18 neih zawh taka best player Laldanmawia leh best forward Lalnunzira Sailo te an kawl a, team ṭha an ni.

Chutihrualin Mual-phengin an match hmasa berah 2004 CYMA Football champion Ramthar Veng rawlthar rual an lehthal thei a, hei hian Salem Veng an hmachhawn hunah pawh huaisenna a pe ang.

Lammual inkhel dangah Aibawk Zone derby hmuh tur a awm dawn. Khaw inṭhenawm Melriat leh Hualngohmun-te chawhma dar 10:30-ah an inkhel dawn. Practice-naah team an inhmachhawn fo a, Vanlalthanga awmna Hualngohmun an chak ṭhin. Inelna takah erawh result a danglam thei tlat.

Kolasib Diakkawn Jt VC hnehtu Farkawn pawh a inlan dawn a, zing dar 8:30-ah Bungtlang South an hmachhawn ang. Farkawn hian ISL player Paul Ramfangzauva an hre lo a, an dah ṭha. Bungtlang South hi an vawi khat inlanna tur a ni a, Kolasib Diakkawn Jt VC hnehtute hi an hlau bik lo ang.

Chawhnu dar 2:30-ah Luangmual leh Venghlui an inkhel dawn. Luangmual hi an vawi khat inlanna tur a ni a, Venghlui erawhin match hmasa berah North Chaltlang 4-1 in an hneh.