Mangṭha mai le Andy Murray

Wimbledon vawi hnih champion tawh Andy Murray chu John Isner hneh loin second round-ah a tla. British tlangval hian a tum ram thleng zo lo mah se, season tawp dawn lama khelh tur US Open atan beiseina a la neih thu a sawi.

Champion lai Novak Djokovic erawhin harsatna a la tawk lo. Serbian star hian a khingpui Thanasi Kokkinakis chu 6-1, 6-4, 6-2 a hnehin third round a inhlangkai a, a zawna a vawi li nan champion a tum ruh hle.

Mangṭha Andy
World number 1 hlui Murray hi tunah chuan kum 35 mi a ni tawh, a vanglai a pelh tawh bakah kum thum chhung vel chu hliamin a tibuai tawh. Tennis chawlhsan tum hial ṭhin mah se a la inkhel lui hram hram, thlen san erawh a harsa tawh.

Nilaini zan second round inkhelah John Isner chuan Murray hi 6-4, 7-6 (7-4), 6-7 (3-7), 6-4 in a hneh. Kum 2018 semifinalist Isner hi service nei ṭha a ni, vawi 36 ngawt aces vaw chhuak chungin Murray hi a hneh.

Wimbledon inbuatsaih lai khan Murray hi a pum a nuam lo, tournament a khelh lai pawh a khel zo thei lo. Grass court inelna lianah erawh a inlan thei ta tho, a match hmasa zawkah chak mah se player ṭha Isner hneh tur chuan a taksa a chak tawk lo.

Grand Slam vawi thum champion tawh Murray chuan, "A nihna takah chuan tlan a harsa, match hmasa lama player ṭha hmachhawn hi chu engtik lai mahin a awlsam ngai lo bawk," a ti. Wimbledon a khelh hnuhnung 13 zetah third round a pel thei ta lo a ni.

Novak a nghet
Djokovic-a'n a match hmasa zawkah set khat a hloh a, match hnihnaah erawh a chesual nawn lo. A service a hloh miah lo a, darkar hnih chiah chiah an inkhelh chhungin dinhmun hlauhthawnawma awm lai a nei miah lo.

Wimbledon vawi ruk champion tawh Djokovic chuan, "Mipui thlawpna ṭha dawn hi chu a nuam, ka tan chuan hmun nuam leh hlimawm tak a ni chiang ngei mai. Ka khelh dan zawng zawngah pawh ka lung a awi hle," tiin a sawi.

Tun hnaiah Djokovic-a'n a tan Wimbledon a hlut zual thu a sawi, he thu a sawi chhan chu Australian Open bakah US Open pawh khel thei lo dinhmuna ding thei a nih vang a ni. Hripui laka invenna a lak duh loh avangin New York a pan thei dawn em, tih a la hriat loh.

Grand Slam vawi 20 a champion tawh a, major title lak hnem lamah vawi 22 champion tawh Rafael Nadal a phak lo. Chuvangin a tan Wimbledon title lak a pawimawh takzet, season dang zawng aiin a ṭang zual ngei ang tih a chiang.

Inkhel dang
Mipa ranking sang pathumna Casper Ruud a tla. A nihna takah chuan Ruud hi champion rinkai zinga mi a ni, mahse rin loh tak maiin French Open finalist hi Ugo Humbert lakah 3-6, 6-2, 7-5, 6-4 in a zinkawng a tawp nghal a ni.

Ruah sur vangin a hunah tak inkhel bul an ṭan thei lo, mahse hei hi Humbert tan a lawmawm. Inkhel tur ni mah se racquet a ken theihnghilh. A tir lamah a haihawt vangin fans hlimna a siam a, match tak takah pawh a khelh ṭhat vangin mipui thawm a ṭha hle.

Nilai zan inkhel dangah rawlthar Carlos Alcaraz chuan world number 53 Tallon Griekspoor chu 6-4, 7-6 (7-0), 6-3 in a hneh. Kum 19 mi Alcaraz hian a match lehpekah chuan Oscar Otte a tum dawn, a chesual viau a nih loh chuan thlengsang tura rinkai zinga mi a ni.

Reilly Opelka-a'n vawi 19 aces siam mahse, a khingpui Tim van Rijthoven lakah 6-4, 6-7 (8-10), 7-6 (9-7), 7-6 (7-4) in a chak lo. Francis Tiafoe erawhin German player Maximilian Marterer 6-2, 6-2, 7-6 (7-3) in a hneh thung.