AIFF general secretary a bang

India rama football thuneitu sang ber, All India Football Federation (AIFF) general secretary Kushal Das chuan a hriselna dinhmun chhuanlamin, AIFF hruaitu a nihna aṭanga a banna a thehlut.

Kushal Das hian kum 2010 aṭang khan AIFF secretary hna hi a chelh ṭan a, a hun chhungin sum tihchingpen leh a nih dan tur anga sum hman loh chungchangah mualphona a nei fo.

AIFF hi tun hnaiah an talbuai hle - a hunah inthlan an huaihawt theih loh avangin Supreme Court chuan tun hnaiah khan hruaitute chu an dinhmun chelh thei loin a hrem a, Das pawh hian Supreme Court-in AIFF enkawl lailawk tura a ruat Committee of Administrators (COA) hnenah a banna hi a thehlut.

Khawvela football thuneitu sang ber FIFA leh Asian Football Confederation thuneitute pawh tun hnaiah khan Indian football dinhmun zirchiangin an rawn zin a, Indian football-a mi pawimawhte nen inkawmna neiin an zingah hian Mizoram Football Association secretary Lalnghinglova Hmar (Tetea Hmar) pawh a tel.

AIFF chuan Kushal Das chu a hriselna dinhmun vanga chawl a nih thu sawiin, "AIFF chuan a thutlukna hi a zah a, AIFF secretary a nih chhunga a hnathawh avangin a chungah lawmthu kan sawi a ni," an ti a, AIFF secretary lailawk Sunando Dhar chuan Das-a hmun ruak hi a luah rih dawn a ni.

Indian football thuneitu lamin Das-a chawlh chhan hi a hriselna dinhmun vang angin sawi mah se, tun hnaia buaina chu a chhan langsar zawka ngaih a ni a, June 20 aṭanga hriselna chhuanlama chawlh la tawh Das hi sum lamah a fihlim lo hle.

Mi ṭhenkhat chuan Committee of Administrators (COA) lamin Das hi chawl turin an ti niin an sawi. Comptroller and Auditor General of India chuan Praful Patel-a hnuaia AIFF sum hman dan an endik a, thil fel lo an hmu nual tawh.

Das hi tun hnai khan AIFF hnathawk hmeichhia chuan mawi lo taka cheah a lo puh tawh a, Asian Cup qualifier-ah khan India dinhmun tur hriat nan astrology firm (ai en thiam) chu cheng nuai 16 ngawt sengin an lo rawn tawh tih COA chuan an hmu chhuak bawk.