Raphinha leitu tur a la chiang thei lo

Brazilian winger Raphinha kalna tur ber a la chiang thei lo a, Leeds United player hi Arsenal, Chelsea leh Barcelona ten lakluh tumin an hel vek - he thuziak i chhiar meuh chuan a kalna tur hi a chiang tawh zawk hial mai thei.

Arsenal chuan Raphinha hi lakluh tumin an lo dawr tawh a, mahse, khawthlang media-te tarlan dan chuan London club-in an dawrna zat hi pound maktaduai 40 hnuai lam a ni a, Leeds-in £50mtd aia tlawma hralh an tum lo thung.

Hetiang boruak karah hian Chelsea an lo lang ve leh a, London club neitu thar, American sumdawng hausate chuan Raphinha hi Blues-a attacking line-up thar an siam tura tel turin an duh.

Chelsea hian an striker Romelu Lukaku chu Inter Milan-ah loan-in an kir tir tawh a, Raphinha bakah hian Manchester City forward Raheem Sterling chu lakluh ngei an duh bawk.

Mahse, Chelsea hian he thu buatsaih thleng hian Raphinha lakluh tumin official taka sum leh paia Leeds United dawrna an la nei lo a, Sterling chungchangah City pawh dawr tawh mah se he thu buatsaih lai hi chuan official-in an ngamna zat an la sawi lo.

Hetihlai hian Barcelona thawm pawh a ri ring viau - Catalan club hian Raphinha hi lakluh ngei an duh nia sawi a ni a, player agent leh Barcelona player hlui ni bawk Deco chuan a player hi Catalan club-a kaltir ngei a tum niin an sawi.

Raphinha agent Deco hi Nilaini khan Barcelona khawpuiah Barca president Joan Laporta leh club sporting director Mateu Alemany nen hmuh an ni a, inbiakna an nei ngei tih a chiang.

Chutihrual chuan Barcelona hian Robert Lewandowski lakluh an tum bawk avangin sum lamah an chuti lua lo ang tih chu thil chiang sa a ni a, Polish striker lakluh an duh bawk si chuan £50mtd man Raphinha an lalut thei kher ang em, tih chu zawhna a ni.

Raphinha hian season hnih liam taah khan Rennes aṭangin Leeds hi £17mtd-in a zawm a, season hman zawh takah khan inelna hrang hrangah match 36 khelin goal 11 a khung a, assist vawi thum a nei - Leeds a pan hnuah match 66 khela goal 17 khungin assist vawi 11 a nei bawk.

Leeds hian midfielder Kalvin Phillips chu Manchester City-a kal an rem ti tawh a, an player manah hian £45mtd an dawng dawn - Raphinha pawh man tlawm tak chuan a chhuak lo ang.