Athletico Paranaense-ah Fernandinho a kir

Manchester City captain hlui Fernandinho chu a professional zinkawng ṭanna Athletico Paranaense-ah a kir a, kum 37 mi midfielder hian sawmna hmu nual mah se a club hlui lama kir a thlang.

Fernandinho chuan, "Sawmna tam tak kan dawng a, Brazil mai ni lo, ram pawn aṭang pawhin sawmna kan dawng. Mahse, ka ina lo haw a, Athletico-a ka theihna zawng zawng hlan hi thutlukna ṭha ber a ni," a ti.

Brazil tan vawi 53 inlana goal hnih khungtu Fernandinho hian Athletico tan 2002-05 a khelh hnuah kum 2005 khan Shakhtar Donetsk a zawm a, Ukrainian club aṭang hian kum 2013 khan City a zawm.

Manchester City tan Premier League (5), FA Cup (1), League Cup (6) leh FA Community Shield (1)-ah champion nomawi a chawi a, Champions League erawh a champion ta lo.

Brazilian midfielder chuan, "Club pathum tan chauha khel chungin ka career ka mangṭha dawn - Europe-ah club pahnih ka nei a, Brazil-ah pakhat. Ka hlim takzet a, ka thutlukna siam kawnga min thlawp ṭhintu ka chhungte chungah lawmthu ka sawi a ni," a ti.

City tan match 383 a khelha goal 26 leh assist neitu Fernandinho chuan, "Keimah chauh ni loin, kan chhungkuain kan lawm em em a ni," a ti a, a hmangaih hmasaa a kir thei chu a lawm hle.

Athletico hi Brazil coach ropui Luiz Felipe Scolari enkawl lai an ni.