Pep leh City an ral ; FA Cup final vawi 20 lut thei Arsenal
Pep Guardiola-a'n Premier League club a enkawl ṭan season-ah nomawi a chawi dawn lo tih a chiang ta!
Pathianni zan khan Arsenal chuan FA Cup semifinal-ah Spanish manager Pep-a enkawl Manchester City chu 2-1 in an hneh. Gunners hian FA Cup final vawi 20 an luhna a ni a, final lut hnem ber an ni.
Wembley Stadium-ah City tan Sergio Aguero-a goal khung chu Arsenal wing back Nacho Monreal-a'n a sut a, hun pangngaiah 1-1 a ni. Extra time khelh niin Alexis Sanchez-a'n Gunners chakna goal a khung.
May 27-ah Arsenal hian Tottenham Hotspurs hnehtu Chelsea nen Wembley Stadium-ah nomawi an inchuh ang.
Wenger-a thluak
Arsenal manager Arsene Wenger-a'n Middlesbrough an hneh ṭumin tlarhnungah player pathum a dah, kum 20 chhunga hetiang formation a hman vawi khatna a ni.
City lakah pawh Gunners tlarhnungah Laurent Koscielny, Gabriel Paulista leh Rob Holding te an ding leh - Alex Oxlade-Chamberlain leh Nacho Monreal te chu wing back an ni.
Goal khat ve ve
Spanish manager Guardiola-a'n a hun bul lama a chhawr duh loh Yaya Toure chu inkhel bul a ṭan tir a, David Silva nen midfield-ah ro an rel. Barcelona midfielder hlui Toure hian minute 62-naa Aguero-a'n goal a khung theih nan through ball ṭha zetin a pet sak.
Arsenal-in si an phur rei duh bik lo, goal an phurh aṭanga minute 11 hnuah an sut nghal. Right wing back atana hman Chamberlain cross chu Monreal chuan chiang zetin a hlap lut.
City = Vanduai
City lamin na takin an nawr chhunzawm, Toure-a'n goal ban a pet per a, Fernandinho chuan crossbar a tauh per bakah an goal khung pawm a ni lo.
Hei bakah hian Leroy Sane cross chu Raheem Sterling-a'n goal-ah chantir mah se pawm a ni lo. Assistant referee Steve Child-a'n Sane cross chu crossbar chunga a kal laiin a out hmanah ngaiin a phar! Replay ennawn a nih hnuah a out lo niin a lang - Pep leh City an vanduai!
Second half-ah goal a lut lo a, Arsenal pawhin chance an nei ve tho. Olivier Giroud thlaktu Danny Welbeck-a'n City keeper Claudio Bravo chauh a hmachhawn tawhah goal a khung thei lo.
A hunah Sanchez
Extra time minute 101-naah Sanchez-a'n buai nuaih kar aṭangin chakna goal a khung. Chile international hian Wembley-ah match thum a khelh aṭangin goal li a khung tawh - Arsenal player zingah England-a an stadium ngaihluta goal khung hnem ber a ni.
French manager Wenger-a'n Chamberlain leh Monreal a khelhtir dan tur a thlang fuh, England international hian tlarhnung a puih ṭhat bakah cross vawi riat neiin Arsenal goal nawrna thapui pawimawh a ni phak - Monreal-a'n goal pawimawh a khung bakah a venhim kawngah a thawh hlawk hle bawk.
Substitution pali
Pep Guardiola-a'n player pali a thlak a, hei hi dan ang thlap a ni. FA Cup-ah hian quarterfinal aṭangin replay tihtawp a ni a, hei vang hian team pahnih an inhnehtawk a nih chuan exra time khelh tur a ni.
Minute 90 chhung hian football dan pangngai angin player pathum thlak theih a ni a, extra time khelh a nih chuan player pali thlak theih a ni.
Pep a nil
Sum ngah Manchester City-in Champions League nomawi an duh a, an manager duh ber Guardiola an lalut. Kum 46-a upa Pep hian Barcelona kum li a enkawl chhungin nomawi 14 a chawi a, Bundesliga champion Bayern Munich-ah kum thum a cham chhungin nomawi pasarih a seng khawm hman bawk.
Barca leh Bayern hlawhtlin puitu Pep hian City a zawm hnuah sum tam tak sengin John Stones, Ilkay Gundogan, Bravo leh Gabriel Jesus te a lalut - nomawi duha tuihal City fans beiseina a sang zual.
Mahse, beisei angin thil a kal lo. City hian League Cup last 16-ah Manchester United an hneh lo, Champions League lamah pawh AS Monaco hneh loin quarterfinal an thleng lo. FA Cup-ah Arsenal hneh loin an zing kawp a tawp zui a, league lama an dinhmun chu palina a ni - hmahruai Chelsea an phak lohna chu point 11 zet a ni a, match ruk bak khelh hmabak an nei tawh lo.
Eng nge an sawi?
Manchester City manager Pep Guardiola chuan, "Arsenal khan goal venhim an ngai pawimawh hmasa zawk a, keini lamin hun ṭha kan insiam tam tawk lo thung. Tunah chuan league table-a a sang pali zinga tel tumin theihtawp kan chhuah zui ang," tiin season thara Champions League khelh tum chu an hmachhawp awmchhun a nih tawh thu a sawi.
FA Cup vawi ruk champion tawh Arsene Wenger chuan, "Kan tan chuan kan rilru huaisen zawng fiahna ṭha tak a ni. Hun harsa kan paltlang mek a, team hi inṭhen hrang thei kan nih rualin thawkho thei kan ni bawk. Vawiin kha chuan kan inlungrualna ṭhat zia kan lantir," tiin fiahna an paltlangah a ngaihthu a sawi.