Aizawl hneh tum Lajong coach

April 30-a Aizawl FC nena an league match hnuhnung ber khel tur Shillong Lajong chuan khualmualah minute 90-naa Yuta Kinowaki goal khung hmangin Mumbai FC chu 1-1 in an inhnehtawkpui a; Pathiannia an inkhelh zawha Lajong coach Thangboi Singto zawhna dawn tam ber erawh Mumbai nena an result ni loin Aizawl FC nena an inkhel tur chungchang a ni.

Thangboi chuan Aizawl FC an mikhual tur thlirlawkin, "North East Derby-ah hnehna chan loh kan duh dawn lo. Professional kan ni a, player leh coach kan nihna anga kan tih tur chu kan hmabak match apianga chak zel tum hi a ni. Aizawl FC tan match pawi­mawh ber a ni mai thei a, kan tan pawh a pawimawh ve tho a ni," a ti.

Lajong coach Thang­boi chuan an nau en ṭhin Mizo club nena inthlauh lutuk a duh loh thu sawi nghalin, "Lajong hi thui takin hmarchhak football-a sulsutu kan ni a, mah se mid-table hi kan dinhmun a ni tlangpui. AFC hian nomawi chawi turin draw tal an mamawh a, league match tawp ber a nih avangin chak kan tum ang."

"Team pahnih tan kan inkhel tur hian pawi­mawhna hran ve ve a nei a, Shillong Lajong hi chuan inkhel zawng zawngah chak kan duh avangin kan inkhel turah inunauna tih velin awmzia a nei dawn lo," a ti a, a player-te pawhin Aizawl FC lakah ṭhat an chhuah loh tur thu a sawi!