PFA Player of the Year Kante
Chelsea midfielder N'Golo Kante chu Professional Footballers' Association Player of the Year-ah thlan a ni a, he dinhmun luah tur hian Eden Hazard, Harry Kane, Romelu Lukaku, Zlatan Ibrahimovic leh Alexis Sanchez te a khum.
Season hmasaa Leicester City tan nomawi a chawi hnua Chelsea-a champion leh thei dinhmuna ding mek Kante chuan, "Ka inkhelhpui ten player ṭha bera min thlang hi ka lawm a, he chawimawina dawn hi a nuam a ni. England-a ka bul ṭan dan hi a hlimawm ka ti. Season hmasaah ka champion a, tun season-ah champion leh thei dinhmunah ka ding mek bawk," tiin a hlim hle.
Kante hian tun season-ah assist vawi khat neiin goal khat chiah la khung mah se vawi 31 inlan tawhah pass 1899 neiin 88.78% a pass dik a, tackles 110 neiin Everton midfielder Idrissa Gueye (127) chu amah aia tackle nei hnem awmchhun a ni a, interception hi 72 neiin United midfielder Ander Herrera chiah a tluk lo.
Tottenham Hotspur midfielder ṭhangduang Dele Alli chu PFA young player of the year-ah thlan a ni a, season hnih chhung a zawna he chawimawina a dawnna a ni. England captain hlui leh Manchester United legend David Beckham chu PFA Merit award pek a ni bawk.
Spurs tan tun season-a goal 16 khung tawh, kum 21-a upa midfielder chuan, "Ka hlim takzet a, ka khelhpuite ngeiin he chawimawina dawng tura min thlang hi ka lawmna belhchhahtu a ni," tiin a sawi.
Zanin dar 12:15 hian Chelsea-in Stamford Bridge-ah Southampton an mikhual dawn. Blues hian FA Cup-ah league-a an elpui ber Tottenham Hotspurs hnehin final lut mah se zanina Saints an hneh si loh chuan Antonio Conte hote hi an nomawi awh zawk Premier League chan thei dinhmunah an ding.
Chelsea-in vawi 32 khelhah point 75 an hmu a, Tottenham-in hetiang zat bawk khel hian point 71 an hmu tawh a, an inthlauhna hi point li chauh a ni.