Belgium-ah Jeho-a hlawhtling

Table tennis inelna, Belgium Junior and Cadet Open 2017 khelh zawh takah Jeho Himnakulh­puingheta chuan cadet (Under 15) singles-ah bronze medal a la. Mizo naupang duhawm Jeho-a telna India chu team inelnaah chu pathumna an ni bawk.

India sub junior number 1 Jeho-a hian Massart Alessi (Bel) leh Suwondalud Waitin (THAI) te hnehin main draw a in vaw kai a. Pre quarterfinal-ah seeded pakhatna Russian naupang Rozhkov Mikhai chu 3-0 in a sawp!

Lungei Salem Veng naupang hian quarterfinal-ah Belik Simon (Cze) hneh lehin a sang pali zingah a inhlang kai. Inrinni lamah team semifinal khelh niin hetah hian a keah hliam tenau a tuar. Pathianni a singles semifinal khelhah team quarterfinal-a a hneh tawh Degros Nicolas lakah 10-12, 11-8, 6-11, 3-11 (1-3) in a vanduai ta a ni.

Sub-Junior National TT Champion­ship 2016 champion Jeho-a chuan, "Europe-ah ka zin vawi khatna a ni a, an khelh dan hmang ka zir a ngai nasa hle. Ka thlen chinah ka lawm a, min ṭawngṭaipui tute vanga hetiang dinhmun thleng thei hi ka ni," tiin Vanglaini palai a hrilh. Jeho-a hian May 4-ah Aizawl a rawn thleng ang.