Pacers hnehin Cleveland an tlang

Cleveland Cavaliers chu conference semifinal lut hmasa ber an ni. Pathianni zan NBA playoff inkhelah Cavs hian Indiana Pacers 106-102 in an hneh a, best of seven khelh turah match hmasa palia hnehna an chan vek avangin series 4-0 in an la.

Bankers Life Field­house-a Game 4 inkhelah LeBron James chuan point 33 a score bakah rebound vawi 10 lain double double a nei a, playoff first round biakah James hian a club vawi 21 hnehna a chanpui tawh, ani chiah hi hetiang din­hmun luah thei hi a la awm.

Cleveland hi Game 3-ah an talbuai a, halftime-ah 25 zetin an hnufual a, quarter hnuhnung pahnihah an insiamṭha hram. Game 4-ah erawh quarter hmasa pahnih an khelh zawh chuan point rukin hma an hruai a, hnufual lai nei loin hnehna an chang zui.

Kum 32-a upa James chuan, "Team ṭha tak kan hmachhawn a, huaisen taka min beih avangin kan tan a harsa hle. Kan chakna chhan chu kan thawhhona ṭhat vang a ni," a ti. Season hmasa khan Cavs hian Golden State Warriors hnehin NBA nomawi an chawi a, James hi Finals bikah Most Valuable Player (MVP) atan thlan a ni.

Nimin zing playoff inkhel dangah Houston Rockets chuan Oklahama City Thunder 113-106 in an hneh a, series-ah Rockets hian 3-1 in hma an hruai. Game hmasa pahniha an chak loh zet hnuah Boston Celtics chuan Chicago Bulls 104-95 a hnehin series-ah 2-2 chiah a ni.