Bernabeu ngawihtirtu Lionel Messi

Santiago Bernabeu-in 'Lal' che tla lai an hmu a, mahse an Lal hmuh erawh an hmuh duh Cristiano Ronaldo ni loin Lionel Messi a ni. Pathianni zan khan Barcelona tana Messi goal 500-na hmangin Catalan club hian Real Madrid chu 3-2 in an hneh - La Liga nomawi inchuh boruak a nung sawt.

Minute 77-naah Real captain Sergio Ramos hnawhchhuah a nih avangin Zinedine Zidane-a nauten player kim loa hun tawp lam an hman a ngaih phah a, Barca laka red card chawi pawi zia an hre chiang tawh ang!

Inkhel hmuhnawm

Santiago Bernabeu-ah team pahnih an inhlau lo tawn a, goal khung hmasa zawk nih tuma an inrumṭhaih tawn zak zak hnuah goal khung hmasatu chu Real Madrid an ni - minute 28-naah Ramos-a'n post a pet per aṭanga ball let chu Casemiro-a'n hmahruaina goal ni turin a khung.

Barcelona-in rei tak si phurh an tum lo. Goal an chhuah aṭanga minute nga hnu lawkah Messi a inlar a, Argentine forward hian mawi zeta ball a lakluh hnuah an si phurh sutna goal a khung. Team pahnihin an hun ṭha neih an inhlahsiak a, goal dang lut loin chawlhlawk hman a ni.

Ramos Out!

Second half-ah Barcelona-in goal an khung hmasa zawk a, hrem vanga khel thei lo Neymar tana hnehna chan an tum tur thu sawitu Ivan Rakitic-a'n a ṭawng mai mai lo tih pholan nan tawih zetin an goal hnihna a khung. Real an talbuai chhunzawm a, Ramos chu hlauhawm taka Messi a tlawh avangin hnawhchhuah a ni.

Mahse, Real tan rin loh takin substitute James Rodriguez chuan minute 85-naah an si phurh sutna goal a khung a, team pahnih hi point insemin an ṭin mai dawn niin a lang hman. Mahse, hun pek belh minute hnihnaah Messi bawk a inlar a, Real defender ding thuah karah 'a duhnaah tak' goal a khung - hun a tawp zui a, Real-in tih theih an nei tawh lo.

Tu nge dang thei?

Engtinnge Messi i dan theih ang? tih zawhna hi Real player-te hnenah pek ni se 'foul' tih chu an chhanna a nih ngei a rinawm a, chhanna dik erawh a ni lo tih chu Real bawk hi a hrechiangtu an ni. Messi laka foul vangin Ramos hnawhchhuah a ni a, Casemiro chu Messi laka vawi hnih lai a foul vanga hnawhchhuah a nih loh avangin a vannei takzet a, Mateo Kovacic-a'n yellow card a hmuh phah a, Marcelo-a'n a nghawk avangin Messi hi a ka a thi hial - an dang zo chuang lo.

Lionel Messi hian tun season-ah match 46 khelin goal 47 a khung tling leh der tawh a, Barcelona tana a goal 500-na khung tur hian match 577 bak a mamawh lo - club tana goal khung hnem ber ni mekin amah hnaih bertu Cesar Rodriguez Alvarez chuan goal 232 bak a khung lo. Kum 29-a upa forward hian La Liga-ah goal 31 a khung tawh a, amah hnaih bertu Luis Suarez-a'n goal 24 chiah la khungin pathumna Ronaldo goal khung zat chu 19 a ni.

Barca harhna?

Champions League quarter­final luh a, league nomawi beisei thei dinhmuna din bawk hi 'season chhia' tia sawi chi ni lo mah se Luis Enrique enkawl club hi Barcelona an nih miau avangin an tlachhe ta em ni? tia zawhna tam tak a awm a, a chhanna erawh El Clasico-a an khelh dan hmangin pek a ni.

Eng club pawh nise Messi a awm miau chuan 'tlachhia' anga sawi ngawt hi a hmanhmawh thlak a, Messi a hriat loh thlak! Catalan radio chuan, "Nomawi inchuh a la nih chhan chu he nau awm vang hi a ni, nomawi inchuh a la nih chhan chu 'a ṭha ber' a inlar vang a ni, nomawi inchuh a la nih chhan chu 'number 10' a inlar vang a ni," tiin an sawi a, Barca tana Messi ṭangkaina an sawifiah chiang hle.

Eng nge an sawi?

Barcelona boss Luis Enrique chuan, "Tunah hmahruaitu ni mah ila Madrid hian keini aiin match khatin an khel tlem zawk a, season tawp ni thlengin nomawi kan inchuh ang. Kan result duh tak kan hlawh chhuak a, 2-2 a nih lai khan hrehawm ti viau mah ila hlimawm takin a tawp a ni," tiin a hlim thu a sawi.

Real Madrid coach Zinedine Zidane chuan, "Engmah a la inthlak danglam lo. Zanin kan result avang khan nomawi inchuh boruak hi a nung sawt a ni mai thei a, mahse engkim hi kan kuta awm a la ni," tiin an hmabak match ruka an chak vek chuan an champion theih tih a chiang.