Monte Carlo roreltu Nadal

Rafael Nadal chuan darkar khat leh minute 16 chhunga Albert Ramos-Vinolas hnehin a vawi 10 nan Monte Carlo Masters nomawi a chawi.

Pathianni zana final khelhah ATP World Tour Masters 1000 title 29-na chawi turin Nadal-a'n Vinolas lakah harsatna a tawk lo, a service a hum ṭhat bakah set pahnihah a khingpui service a chhuhsak ve ve a, 6-1, 6-3 in hnehna a chang. Kumin Monte Carlo-ah Nadal hian match nga a khelh aṭangin set khat bak a hloh lo.

Spain tlangval Nadal hian clay court bikah nomawi 50 a chawi ta a, Guillermo Vilas nena champion hnem ber nih an inṭawmna chu kalsanin champion hnem ber a ni.

Kuminah Nadal hi a vannei tawk lo, Monte Carlo hma hian final vawi thum a khelhah a chak lo zawkah a ṭang vek. A inkhelh thiamna clay-ah erawh dan theih a ni ta lo - tunkar chhunga khelh tur Barcelona Open-ah a inlan zui leh nghal ang.

Kum 30-a upa Nadal chuan, "ATP Tour zinga inelna langsar tak pakhatah a ṭum 10 nan ka champion a, ka tan chuan hlawhtlinna hlu bik niin claycourt season kan hman chhoh tur atan phurna min siamsak zual hle," a ti. May thla hian French Open khelh a ni dawn a, Nadal hi a vawi 10 nan Roland Garros-ah hian champion tura rinkai a ni leh ang.