Kan hmelmate hi kan ṭhian ṭha ber an ni - Bagan Director

Mohun Bagan Director Debasish Duta chuan, an ṭhian ṭha ber chu an hmelma East Bengal an nih thu a sawi a; an elpui phak khawpa Aizawl FC-in hma an sawn chu lawmawm a tih thu a sawi bawk.

Mizoram Football Association chuan April 21 zan khan State Guest House, Chaltlangah AIFF, Mohun Bagan leh Aizawl FC hruaitute pualin zanriah a buat­saih a; he hunah hian India rama football hruai­tu pawimawh ten an ngaih­dan tlang takin an sawi.

Ṭhian leh hmelma

Bagan Director chuan, "Kum 127-a upa club kan ni a, kan ropuina chhawm nung zel tur chuan elpui kan neih a ṭul a ni. Kum 1911 khan IFA Shield-ah ke lawnga khelin Mohun Bagan hian British ho kan hneh a, kan elpui an ṭhat avangin kha inkhel kha hriat reng tlak a ni," tiin inelna nung tur chuan inel tawk an awm a ṭul thu a sawi.

East Bengal pawi­mawhna sawi langin Debasish chuan, "Ka tan chuan East Bengal awm hi vanneihna a ni a, kan ṭhian ber chu anni hi a ni. Anni hi awm ta lo se chuan tun dinhmun hi kan thleng thei lo ang ," tiin a sawi.

"Kum 1996-a NFL awm ṭan khan kan tel pha lo a, kum hnihnaah AIFF hruaitute duhsakna dawngin min khelhtir a. Khelh kan phu tih lantir nan kum 1997-ah kan champion nghal. Aizawl FC pawh an relegate hnua hetiang dinhmun an thleng thei hi ka lawmpui - pakhatna an ni thei a, pahnihna an ni thei bawk," tiin Mizo club chu pahnihna ni turin a duhsak zawk tih a ṭawng thluk danah a hriat theih.

AIFF a sel

AIFF general secre­tary Kushal Das hmaah Debasish-a'n a sawi duh zawng a sawi loh phah chuang lo.

Bagan hotupa Debasish chuan, "Tetea Hmar vang chauha rawn kal ka ni a, a hranpain min rawn be lo se chuan ka rawn kal lo ang. Ani anga football kalhmang hria AIFF committee-a an awm hi lawmawm ka ti a, India ram tan a ṭha a ni," tiin MFA honorary secretary Lalnghinglova Hmar a fak.

Debasish chuan sawi chhunzawmin, "AIFF-ah hian football hre miah lote an awm a, hei hi kan ram football ṭhanmawh bawk an ni. Ṭhenkhat phei chu football hre miah loin treasurer hial te an ni thei a ni," tiin India ram football-ah insiamṭhatna tur a tam thu a sawi.

Thutlukna dik

Aizawl FC-in tun season-a I League khel turin AIFF duhsakna an dawng a, general secretary Kushal Das chuan Mizo club laka an thutlukna chu an tifuha a hriat thu a sawi.

AIFF general secre­tary Kushal Das chuan, "I League aṭangin Aizawl FC an relegate a, Federation Cup-a an chet ṭhat khan min hmin a, tun season khel leh tura AIFF-in thtulukna kan siam hi kan tifuh hlein ka hria," tiin Mizo club che ṭha chu lawmawm a tih thu a sawi.

MFA fak chhun­zawmin Kushal Das chuan, "MFA an entawn tlak hle a ni. National level leh club level-a an hlawhtlinna hi a chhuanawm hle. National team-ah 23% an thawh thei hi a ropui a, tun hnai­ah nasa takin hma an sawn a ni," tiin football-a Mizoram hmasawnna a hmuh hmaih lo.