United lehpelh phakah Liverpool
Manchester United-in Zlatan Ibrahimovic tel loin Burnley 2-0 in an hneh a, Sadio Mane tel lohna Liverpool-in Crystal Palace an ngam lo.
Pathianni zan Premier League inkhel result avang hian Jose Mourinho hoten Reds an phak lohna chu point thum a ni. United hi an hmelma Liverpool aia match hniha an khelh tlem avangin Champions League khel tur inchuhna boruak a sang chho zel.
Mangchhia thlentu Benteke
Liverpool midfielder Philippe Coutinho-a'n yard 30-na aṭangin freekick mawi tak a khung a, minute 42-na a ni. Reds tan goal khat hi chak pui tham ni mah se an leina man zat aia pound maktaduai ngaa tlawma an hralhchhuah Christian Benteke an dang zo lo.
Jurgen Klopp-a'n Borussia Dortmund a enkawl laiin Benteke lakluh a tum tawh a, Liverpool a zawm hnuah Belgian forward hi kawl sa mah se a game plan-ah a tel loh avangin a chhuahtir. German coach khawsak dan chu Benteke pawhin hriatthiam harsa a ti.
Liverpool boss Klopp hian boruakah Benteke a ṭha tih erawh a la hre reng a, inkhelh hmain Belgian forward chu ball tauh thei loa siam an tum thu a sawi. Amaherawhchu Benteke hian minute 74-naah a lu hmangin chakna goal a khung a, Belgian forward hian minute 42-naah siphurh sutna goal a khung tawh bawk.
Liverpool manager Jurgen Klopp chuan, "A thinrim thlak a, a lungawi thlak loh a ni. Mi zawng zawngin Champions League khelh theihna hun ṭha kan bawhpelhah an ngai a, amaherawhchu kan hmalam a êng zawnga thlir turin hun kan la nei a ni," tiin hlauhthawn tur a la awm loh thu a sawi.
Palace an him?
Palace manager Sam Allardyce tan Reds hneh hi chanchin ṭha a ni a, club panga enkawla Anfield vawi 14 a tlawhnaah a vawi khat hnehna channa chauh a ni.
Big Sam-a hnuaiah Eagles a zawnin vawi sarih an chak tawh a, match nga khelh tur an la neihah point 38 an hmuh tawh avangin season tharah Premier League an khelh chhunzawm ngei a rinawm tawh.
Martial leh Rooney
Burnley-in tun season-a an point hmuh 36 zinga 32 chu an mual Turf Moor-ah an hlawh chhuak a, amaherawhchu an tlarhma lam an hriam loh avangin Manchester United-in harsatna an tawk lo.
United hian minute 21-naah Anthony Martial hmangin hma an hruai a, French forward thawhrah sengin Wayne Rooney-a'n goal hnihna a khung leh bawk.
Red Devils hian Martial an lakluh hian a contract-ah goal 25 a khung tlin chuan pound maktaduai 8.5 an pek belh tur thu an ziak. Burnley lakah Martial-a'n tun season league-a a goal lina khung chauh mah se United tana a goal 25-na a nih avangin Red Devils hian Monaco hnenah pound maktaduai 8.5 an pek belh a ṭul dawn ta a ni.
United captain Rooney hian January thla khan club tana a goal 250-na a khung a, thla thum hnuah goal 251-na a khung leh chauh bawk.
Manchester United manager Jose Mourinho chuan, "Point thum hmuh harsatna hmuna hnehna kan chang thei hi ka lawm a ni," tiin a naute khelh danah a lungawi.
UCL khel tur?
Manchester United-in khelh zat inangah Liverpool an lehpel thei a, amaherawhchu Jose Mourinho hote khelh hmabakah Manchester City, Arsenal leh Tottenham te an la awm avangin Jurgen Klopp-a hote tan Champions League khelhna kawng a la inhawng zau hle.
United leh Liverpool bakah hian City leh Arsenal ten Champions League hmunruak pahnih an inchuh a, Premier League season tawp boruak a ngaihnawm chho zel ang.
Khelh Hmabak
Liverpool (Pld - 34; Pts - 66)
May 1 Watford (A)
May 7 Southampton (H)
May 14 West Ham (A)
May 21 Middlesbrough (H)
Manchester City (Pld - 32; Pts - 64)
Apr 27 Manchester United (H)
Apr 30 Middlesbrough (H)
May 6 Crystal Palace (H)
May 13 Leicester City (H)
May 16 West Brom (H)
May 21 Watford (A)
Manchester United (Pld - 32; Pts - 63)
Apr 27 Manchester City (A)
Apr 30 Swansea City (H)
May 7 Arsenal (A)
May 14 Tottenham (A)
May 18 Southampton (A)
May 21 Crystal Palace (H)
Everton (Pld - 34; Pts - 58)
Apr 30 Chelsea (H)
May 6 Swansea (A)
May 13 Watford (H)
May 21 Arsenal (A)
Arsenal (Pld - 31; Pts - 57)
Apr 26 Leicester City (H)
Apr 30 Tottenham (A)
May 7 Manchester United (H)
May 10 Southampton (A)
May 13 Stoke City (A)
May 16 Sunderland (H)
May 21 Everton (H)