Marc Marquez chak ve ta

MotoGP champion lai Marc Marquez-a'n tun season-a a vawi khat nan hnehna a chang ve ta. Pathianni zan a tlan zawh tak Grand Prix of the Americas-ah Marquez hi a tlan chak ber a, he hmunah hian vawi nga intlansiak a hmachhawnah hnehna a chang vek.

Texas-ah palina aṭanga bul ṭantu Dani Pedrosa chuan bul ṭan ṭhain hmahruaitu a ni a, pole position aṭanga bul ṭantu Marquez chu pahnihnaah awmin a hnungah Yamaha rider Valentino Rossi leh Maverick Vinales te an awm thung.

Intlansaik hmasa pahnih Qatar leh Argentina-a hnehna changtu Vinales a vanduai, lap hnihna an tlan laiin a chesual a, a intlansiak zui thei lo. Vinales bakah hian Karel Abraham, Loris Baz, Sam Lowes leh Alvaro Bautista te an chesual ve bawk.

Lap sarih tlan hmabak a la awm tihah Marquez hian a dinhmun siamṭhain hma a hruai zui a, a tawp thlengin hmahruaitu a ni tlang - Marquez hnungah hian Rossi leh Pedrosa te an thleng.

Kum 24-a upa Marquez hian a vawi li nan world title a beisei mek. MotoGP bike a khalh chinah vawi 30 hnehna chang tawhin tun season rider championship-ah point 38 a hmu a, pathumna a ni mek.

Spanish rider Marquez chuan, "Qatar leh Argentina-ah beisei ka phak loh avangin chak duhna ka nei lianin beiseina ka nei nasa hle a, qualifying lama kan team kan tlan ṭhat ang bawkin a takah pawh kan che ṭha. Tunah chuan champonship inelna lam kan sawi ri leh thei tawh ang," tiin a sawi.

Italian rider Rossi-a'n a zawn­in vawi thum pahnihna dihmun a luah ta, point 56 hmuin championship hmahruaitu a ni. Rossi teammate Vinales (50 points) chu hmahruaitu a la ni. Kum 38-a upa Rossi hian 2009 season hnuah champion nomawi a la chawi leh lo a, kuminah beisei a nei sang hle.

Kuminah intlansiak pathum an hmachhawn tawh a, intlansiak hmabak 11 chu Europe-ah a ni rih dawn - a hmasa ber atan May 7 hian Jerez, Spain-ah an tlan leh dawn a ni.