Kolkata Knight Riders chakna bowler

Zirtawpni zanah Kolkata Knight Riders-in Gujarat Lions ngam lo mah se Pathianni zanah an insiamṭha lehnghal a, an mikhual Royal Challengers Bangalore chu run 82 ngawtin an sawp.

Eden Gardens, Kolkata khaw­puia inkhelah KKR an bat hmasa zawk a, over 19.3-ah run 131 chiah siama wicket 10 an hloh avangin an dinhmun a chhe hle. Mahse, an batsman te chet ṭhat loh zanah KKR bowler-ten an team an chhanhim a, over 9.4-ah RCB batsman te vawm out vekin run 49 chiah an siamtir!

Batting line up nei ṭha RCB tan Chris Gayle (7), Virat Kohli (0) leh AB de Villiers (8) ten eng ruai an ang lo a, Kolkata tan Nathan Coulter-Nile, Chris Woakes leh Colin de Grandhomme ten wicket thum ṭheuh an lak avangin bowler an langsar hle.

Pathianni tlai inkhelah Kings XI Punjab chuan run 26-in Gujarat Lions an hneh bawk. Kings XI tan Hashim Amla (65 runs) bawk a langsar a, over 20-ah run 188 siamin wicket sarih an hloh.

Gujarat Lions-in theihtawp chhuahin an target um mah se run 58 siama a tawp thleng dam Dinesh Karthik-a'n thlawptu a nei ṭha tawk lo a, over 20-ah run 162 tlina wicket sarih an hloh avangin a tlawm zawkah an ṭang ta a ni.

Zanin Inkhel Tur
Royal Challengers Bangalore 08:00 PM Sunrisers Hyderabad