Hockey World Cup an khel ṭan ; Remsiami telna India inlan dawn
Khawvela hockey thuneitu sang International Hockey Federation buatsaih 2022 Women's FIH Hockey World Cup chu nizan aṭang khan khelh ṭan a ni. Lalremsiami Hmar telna India chuan Pathianni zanah an match hmasa ber an khel ang.
India hian pool match hmasa atan England an hmachhawn dawn. Pathianni zan dar 8:00 inkhel hi Star Sports bakah Hotstar lamah live-a en theih a ni dawn. Mizo nulain Hockey World Cup a khel lai mahni in lum aṭangin kan en thei dawn tihna a ni.
World Cup chu
Tournament thlengtu Spain leh Netherlands te an tlingsa a, khawmualpui hrang hrang panga champion-te pawh an tling nghal bawk. Team dang erawh qualifier hmanga invaw tling an ni thung, a duh duh tan World Cup khelh ngawt theih a ni lo.
India hi Asia Cup aṭanga invaw tling an ni a, tun ṭumah hian pool B-ah India, England, New Zealand, China te nen an awm khawm. League round-ah vawi khat ṭheuh an inkhel kual dawn, a sang berin knockout round an lut nghal ang.
Pahnina leh pathumna tan kawng kawng a la inhawng, mahse pool danga pahnihna leh pathumna dangte nen quarterfinal lut tur an zawn ṭhat leh a ngai dawn a ni. Group hmahruaitu nih ngei tumin an inkhel hlawm dawn tih a sawi ngam.
Mizo nula
India hmeichhe hockey sawi a nih chuan Mizo hming sawi rik a ngai ta zel. Tun World Cup khel tur pawhin Lalremsiami Hmar a tel, Kolasib nula hian inelna hrang hrangah India tan a khel tawh - World Cup erawh a vawi khatna tur a ni ang.
Remsiami chuan, "India tan theihtawp ka chhuah dawn, tun hma pawhin theihtawp ka lo chhuah tawh ṭhin. A sang thei ang ber thlen tumin inelna kan hmachhawn ang, inbuatsaihna kan neih ṭhat avangin inrintawkna pawh kan nei," tiin a hrilh.
Kum 22 mi Siami hian India senior team tan match 86 a khel tling der tawh a, goal 27 a khung tawh bawk. Tun ṭumah hian striker rinrawl Rani Rampal chu hliam vanga koh a ni lo - Siami chungah mawhphurhna a sang zual ngei ang.
Phuba a ngai
Tokyo Olympic-ah khan India hian an tawn sang ber ṭum an thleng a, mahse palina an ni. Bronze medal inchuhna inkhelah rinkai zawk ni chungin an chak lo, medal la loin Japan khawpui aṭangin India an rawn pan.
India tan tun ṭum hi phuba lak theihna remchang a ni dawn. England hi an hneh thei a nih chuan New Zeland leh China hmachhawn turin inrintawkna an neih san phah ngei ang, coach Janneke Schopman chuan a ṭha thei ang bera team rem a tum thu a lo sawi tawh.
Hockey World Cup hi 1974 aṭanga khelh ṭan a ni a, inelna neih hmasak ber ṭumin India hian palina dinhmun an luah, hei hi an thlen san ber a la ni char char bawk. Kuminah hian an record neihsa aia ṭha siam an tum ngei ang.
India Squad:
Goalkeepers: Savita (C), Bichu Devi Kharibam.
Defenders: Deep Grace Ekka (VC), Gurjit Kaur, Nikki Pradhan, Udita.
Midfielders: Nisha, Sushila Chanu Pukhrambam, Monika, Neha, Jyoti, Navjot Kaur, Sonika, Salima Tete.
Pool A: Netherlands, Germany, Ireland, Chile
Pool B: India, England, New Zealand, China
Pool C: Argentina, Spain, Korea, Canada
Pool D: Australia, Belgium, Japan, South Africa
India Fixtures
July 3, Pathianni
India 08:00 PM England
July 4, Thawhṭanni
India 08:00 PM China
July 7, Ningani
India 11:00 PM New Zealand