Match 37 chak záwn Swiatek

Hmeichhe tennis roreltu thar Iga Swiatek hmaah tumah ding zo an awm lo. Polish nula hian Ningani zan khan Pattinama Kerkhove hnehin Wimbledon third round a lut, tun hnaiah a zawnin match 37 chhung zet hnehna a chang ta.

World number 1 Swiatek hi tournament a khelh hnuhnung parukah a champion vek, tun ṭumah pawh hian champion tura rinkai a ni. Kerkhove lakah erawh fiahna hautak a hmachhawn, darkar hnih leh minute li chhungin 6-4, 4-6, 6-3 in a chak hram.

Kum 21 mi Swiatek hian chak zawn rei lamah Martina Hingis a nihrual. Hingis hian kum 1997 khan a zawnin match 37 chhung hnehna a lo chang tawh, a chesual viau a nih ngawt loh chuan Swiatek-i'n a khum chho ngei dawn niin a lang.

Inkhel dangah Wimbledon vawi hnih champion tawh Petra Kvitova pawh a chak. Kvitova hian Ana Bogdan chu 6-1, 7-6 (7-5) in a hneh a, a match lehpekah chuan Irina Bara hnehtu Paula Badosa nen an inhmachhawn leh dawn a ni.

Kum 2019 champion Simona Halep pawh a chak. Romanian star hian 2013 semifinalist Kirsten Flipkens chu 7-5, 6-4 in a hneh. Player ṭha dang Coco Gauff leh Harmony Tan te pawh an chak. Tan-i hian a match hmasa zawkah Serena Williams pawh a lo hneh tawh.