Dan rual loh Rafael Nadal

Rafael Nadal-a'n a duhtawk maia tennis a khel hi chu, amah ṭan lotu tan pawh hmuhnawm thlir taka thlir mai a ngai ngei ang. Nadal ṭantute tan phei chuan tun hnaia a inkhel hi a hmuhnawm zual ngeiin a rinawm - Wimbledon third round a lut leh ta der mai.

Spanish star hian Ningani zan khan Ricardas Berankis chu 6-4, 6-4, 4-6, 6-3 in a hneh, hnehna chang tur hian darkar thum leh minute hnih chauh hun a hmang. Match danga an hun hman ṭhin dan chhut chuan, set li an khelh chhung hi a rei lo viau.

Nadal a fawr
Kephah hliam nei chungin French Open nomawi a chawi a, Grand Slam title pawh 22 a nei tawh. Tunah chuan hliam nei loin a duhtawkin a khel leh thei tawh a, world number 106 Berankis tan dan ngaihna a awm lo a ni ber.

Centre Court-ah Nadal-a'n ṭantu a ngah a, forehand ṭha tak tak a neih laiin thawm a ṭha thei rem rem hle. A service vawi hnih hloh ve bawk mah se, hun pawimawh laiah tak a khingpui service a chhuhsak let ve leh mai ṭhin.

Kumina Australian Open leh French Open champion tawh Nadal hian, a match lehpek atan zanin hian Lorenzo Sonego a hmachhawn ang. Italian tlangval hi seeded 27-na ni phak a ni a, a match hmasa pahnih ai chuan hmachhawn a harsa deuh tawhin a rinawm.

Kum 36 mi Nadal chuan, "Ka bul ṭan dan kha thil ṭha ber chu a ni lo, a hmawr bawk dan erawh duhthusam a ni thung. Hmasawnna lai tur ka la nei, hun rei tak inkhelh hnuah pawh siamṭhat ngai leh hmasawnna tur chu a la awm zel.

"A nihna takah chuan, hun rei vak lo liam taah khan tennis chawlhsan ka tum hman hial. Mahse, tunah erawh chutiang rilru chu ka pu tawh lo," a ti. Hripui lengin Wimbledon a tibuai leh mek a, hei vang hian Nadal chuan a inkhelh bak pawna a chhuah ngai loh thu a sawi.

Tsitsipas a chak
Court number 1 lamah Stefanos Tsitsipas a inlan thung a, champion thei tura rinkai zinga mi hian world number 76 Jordan Thompson chu 6-2, 6-3, 7-5 in a hneh a, third round-ah chuan Nick Kyrgios a hmachhawn leh ang, inkhel a hmuhnawm dawn tih a chiang.

Kum 23 mi Tsitsipas chuan, "British mi ka ni lo a, he hmunah hian sulhnu ropui chhuan tur lah ka nei hek lo. Chutiang a ni chunga fans lamin min thlawp ṭha em em mai kha a mak, grass-a inkhelh hi chu kei chuan ka nuam tih zawng tak a ni," tiin a sawi.

Tsitsipas hmachhawn leh tur Kyrgios chuan inkhel dangah Filip Krajinovic chu 6-2, 6-3, 6-1 in a lo hneh ve bawk. Theihna nei sang, mahse a nungchang ṭha tawk lo vanga thleng sang tawk lo Kyrgios hi Tsitsipas tan zuamsual theih tur a ni dawn.

Australian tlangval Kyrgios hian vawi 25 ngawt aces a vaw chhuak a, a khingpui hi break point a hmuhtir miah lo. A service a ṭhain a na hle a, hei hi a hmawnraw ṭha tak a ni; a nungchang ṭha lo a thup theih chuan thleng sang turin theihna a nei.

Ningani zan inkhel dangah beisei loh result kan hmu. Season hmasa semifinalist, kumina seeded 13-na ni bawk Denis Shapovalov chu American player Brandon Nakashima lakah 6-2, 4-6, 6-1, 7-6 (8-6) a chak loin a zinkawng a tawp.