LBS Suzuki All Mizoram Inter Village Football Tournament ; Inkhelhna hmun siksawi

LBS Suzuki All Mizoram Inter Village Football Tournament kal zel dan turah Mizoram Football Association chuan ruahmanna thar an siam thu an chhuah.

Team 204 an chhuak a, khelmual pawh panga lai hman a ngai a, khelmual remchan hun a inan loh avangin round inang si hi a khelh hun a inang lo thluah a ni. District hrang hranga I Day Football tournament inbuatsaihna nei hmana zawh tum a nih si avangin inkhelh hun siksawi pawh a buaithlak ang.

Hetiang hian MFA-in thu an chhuah:

Ground Rotation:

Tun tournament hi team tel an ṭhathnem avangin khelmual panga lai hman a ṭul a, team ṭhenkhat tan khelmual hla bik leh hnai bik a nih reng lohna turin khelmual hman dan hetiang hian siam rem a ni.

Group A: Lammual lama khel mek Group A-a team 1-26 (fixture-a a chung lam zawng) te chu Third Round leh Fourth round (Round of 64 & 32) MFA Ground, Sairang Dinthar-ah an khel ang.

Group A-a team 27-51 te chu Third Round leh Fourth round (Round of 64 & 32) Lengpui-ah an inkhel tawh ang.

Group B: Rajiv Gandhi Stadium, Mualpuia inkhel Group B hi khelmual remchan loh ni a awm ṭhin avangin group dang aiin an zo tlai dawn a, a tawp lamah match a zawna khelhte pawh a ṭul phah dawn.

Anni hi midang inkhelh hun nen a inrem ve theih loh avangin khelmual danga sawn chhuah a rem lo a, Third Round leh Fourth Round (Round of 64 & 32) chu khelmual pangngai an hmang tlang ang.

Group C: MFA Ground, Sairang Dinthara inkhel mek Group C-a team 1-26 hian Third Round leh Fourth round (Round of 64 & 32) chu Lammualah an khel tawh ang.

Group D: Lengpuia inkhel mek Group D-a lama team 27-51 te chuan Third Round leh Fourth round chu Lammualah an khel ve thung ang.

Round of 16 - Final

Round of 16 aṭangin team zawng zawngin Lammual leh Rajiv Gandhi Stadium-ah zel an khel tawh ang a, quarterfinal aṭangin khelmual pakhatah an inchhung khawm ang.

Final hi July 15-a khelh tura rel tawh ni mah se, player-te inkhel zawn lutuk tur venna atan July 19-ah (Thawhlehni) sawn a ni bawk.

TV leh ticketing:

All Mizoram Inter Village Football Tournament hi Third Round atangin live-a pekchhuah tawh tur a ni a, Lammuala inkhelte chu Zonet TV-in live in a pe chhuak ang a, mipui zawng zawngin an en theihna turin Zonet YouTube channel lamah pek chhuah tel a ni bawk ang.

Inkhel en man hi Third Round (Round of 64) aṭangin Rs 50 a ni tawh ang.