Republic leh Lengpui an chak chiang

LBS Suzuki Inter Village Football Tournament 2022 a ngaihnawm zel - tun inelnaa insawpna nasa ber chu nimin khan a thleng a, Republic Veng LC chuan 17-0 ngawtin Thingsul Tlangnuam VC an sawp.

Lengpui MSC-a inkhelah Republic tan Mizoram striker Lalhriatpuia bawk a langsar leh ta a, goal li ngawt a khung - an match hmasa zawka Bukpui VC an sawp ṭumin Hriatpuia hian hattrick a siam tawh bawk.

Champion tura rinkai inlan zingah Lengpui pawhin tawp mai an la tum lo a, third round lut turin Sesawng VC II chu 12-0 ngawtin inkhelh an lo zirtir.

Armed Veng South LC-in 3-0 in Edenthar an hneh bawk - Bethlehem Vengthlang lam pawhin la inkhelh zel an duh a, Phulpui VC chu 3-1 in an pet chhuak. Luangmual chu Venghluiin 2-0 in an pet chhuak.

Goal khung thiam
Republic-in an match hmasa berah 11-0 ngawtin Bukpui VC an sawp tawh a, an match hnihnaah goal khung an la insum chuang lo - goal 17 an khung a, Thingsul Tlangnuam lamin an chhanlet loh avangin an chak chiang hle - match hnihaha goal 28 an thun!

Lalhriatpuia'n goal li a khung bakah Lalnunzira chuan Republic tan hattrick a siam bawk - F. Lalrinpuia (Valpuia) a la inlan lo mah mah zawk!

Lengpuiin ISL leh I League player bakah player tawnhriat nei ṭha an kawl nual a, Sesawng VC II nen tual khatah an leng lo. Lengpuiin goal 12 an khung a, Sesawngin an khung ve lo.

Aizawl FC forward F. Lalremsanga chuan Lengpui tan goal nga ngawt a khung a, NorthEast United defender Joe Zoherliana'n goal khat a thawh ve bawk - player en mai pawha champin tura rinkai phak an ni.

Khawpui an pui bik lo
ITI Vengin Sairang Dinthar VC lakah Aldrin Ramthansanga hmangin goal hmahruai an khung a, MFA Ground-ah harsatna nei loa chak mai turah an inngai.

Mahse, mahni khawtuala khel Sairang Dintharin tlawm an duh lo a, Tommy Lalmalsawma leh Lalnunfela hmangin second half-ah an 'comeback'.

Ramhlun Vengthar lakah Reiek VC chu vawi hnih ngawt hnufual mah se, an si phurh an sut zel a, a tawpah 3-2 in an chak daih - inkhel a hmuhnawm hle.

Hetihlai hian thingtlang khaw team zinga beiseiawm pawl Khawlailung VC chuan 9-0 ngawtin Sakawrtuichhun an sawp a, Mizoram Police player Lalthantluanga chuan 'double hattrick' siamin goal ruk ngawt a khung.

Team ṭha
Champion beisei zinga mi Durtlang LC leh Dinthar LC te an match hmasa berah an tla nghal a, hei hian knockout tournament-a chet sual theih a nihzia a pholang - kum dangah pawh 'team ṭha ber' hi an champion kher lo.

Hetihrual hian rin hlawh zinga mi Bethlehem Vengthlang erawh an la tlo reng a, team ṭha pangngai tak Phulpui VC chu 3-1 in an hneh - MFA khelmuala inkhel boruak 'hot' takah hian team pahnih aṭangin player pakhat ve ve hnawhchhuah an ni.

Armed Veng South LC-in champion an la tum ve reng tih an pholang nawn a, Edenthar LC chu 3-0 in an hneh.

Salem LC chuan 4-0 in Mualpheng VC an sawp a, Dawrpui Vengtharin 2-1 in Chite Veng an hneh - Mohammedan SC defender Sairuatkima chuan Dawrpui VT tan goal khat a khung.

Chaltlang LC pawhin inkhel an la thiam ve reng tih pholangin Sakawrdai VC chu 9-2 in an sawp a, HK Lalhruaitluanga'n hattrick siamin Zomuansanga'n goal thum a khung.

Champhai team ṭha Zotlang-in champion nomawi an beisei ngam - 9-0 in Bungṭhuam VC an sawp a, Lalbiakdika'n goal li a khung. Champhai Zotlang hi tun hnaia Champhai district inelnaa semi finalist an ni.