Lenchimin Aizawl Venglai an zawh chim!

Mahindra Pik-up hnunga chuang chungin Lenchimin Aizawl an rawn pan a, an match hmasa bera Chaltlang Lili Veng an hneh hnuah Aizawl Venglai an hneh leh ta - tun tournament-a comeback ropui bera chhal ngam an lantir.

Venglai LC hian 3-0 in hma an hruai hman a, mahse, Lenchimin minute 78 hnu lamah goal thum an khung a, 3-3 a ni. Penalty shootout-ah 6-5 in Lenchim an chak ta daih.

Shillong Lajong captain hlui Samuel Lalmuanpuia telna Zemabawk North an hmuhnawm zel a, Zotlang LC chu 7-0 ngawtin an sawp - player ball pet thiam bik Samuela hian goal li a khung.

Odisha midfielder Paul Ramfangzaua telna Kolasib Diakkawn Jt. VC pet thla theitu Farkawn VC-in 4-0 in Bungtlang South an hneh a, champion tum Hualngohmun chuan 11-0 ngawtin Melriat an hneh bawk.

Kawlbem laka hnehna chang turin Bungkawnin vanneihna an mamawh a, minute 73-naah David Zothankima hmanga si phurh an sut zawh hnuah penalty hmangin Kawlbem an hneh hram.

Ramhlun South LC-in 2-1 in Mission Vengthlang LC an hneh a, Vanlalthlamuana leh Lalremruata ten goal khat ve ve an khung.