Electric an êng dawn em?

India rama footballer man to ber Lalengmawia Ralte awmna Vaivakawn leh Electric Veng an inhmachhawn dawn. Inkhel hmuhnawm en duh tan vawiin chawhma dar 11:00 hian Lengpui SMC pan mai tur a ni ang.

Apuia hming a lian a, an khingpui tur tan ngaimawh tham a ni ang. Mahse, Electric Veng coach Vanlalsawma Colney chuan Mumbai City midfielder hi an hlau lo tih Vanglaini a hrilh, ani hmachhawn tura an inpeih thu a sawi bawk.

Mizoram winger ṭha berte zinga mi Lalbiakhlua an nei a, ani châwm tur hian Mizoram Premier League an khelh laia an rinrawl midfielder Zawnhmingthanga Hmar leh Lalrinkima te an la nei bawk - Aizawl FC striker hlui Jonathan Lalrawngbawla an la kawl cheu.

Lengpui boruak a lum ṭhin a, Electric Veng hi an inlan vawi khatna tur a nih avangin coach Sawma chuan fimkhur a ngaih tur thu a sawi. Vaivakawn erawhin an match hmasa zawkah Kawrtethawveng chu 1-0 in an lo hneh tawh thung a ni.

Aizawl khawpui pawna inkhel tur an ni a, kalkawng tlemin a hla ve tham deuh. Nizan khan Electirc Veng hi an inkhelhna tur hmun Lengpuiah an riak tawh, motor chuang hah loin vawiinah an inkhel thei dawn.