Bangkok-ah Mizo boxer inlan dawn

Vawiin hian Spaceplus, Bangkok-ah The Fighter, world boxing huaihawt a ni dawn. Vanlalawmpuia leh F Zoramchhana'n a vawi khat nan India ram pawnah professional boxing an khel dawn a, Thai khawpuiah Thai boxer ve ve an bitum ang.

Inhnek panga awm tur zingah Awpa'n super lightweight-ah Aekkawee Kaewmanee a hmachhawn ang a, super bamtamweight-ah Zotea leh Yutthana Kaensa an innuai ve thung dawn a ni.

India sanaah chhun dar 12:30 aṭangin show ṭan a ni dawn a, Mizo tlangval inlan hun tur tak chiang taka sawi a harsa. LPS pay-per-view aṭangin en theih a ni ang.

India super lightweight number 1 Awpa'n round ruk khelh zawh ngai loin chak ngei a tum tih a sawi a, professional a luhchilh aṭanga vawi li a inhnek tawhah tlawm nei loin ṭum thum a chak.

A beih tur kum 40 mi Kaew­manee erawh vawi 40 inhnek tawhin ṭum 24 a chak a, vawi 16 tlawm tawhin a inhnek hnuhnun vawi hnihah a tlawm zawn a, mahse, khawtual mi a nih vangin mipui ṭan hlawh zawk ni chungin 'The Animal' Awpa a bei dawn.

Zotea'n a inhnek tawha pawimawh em em leh a hma lam hun hril tur a ni tih a hrechiang a, professional huangah vawi thum inhnek tawhin a tir vawi hnih a chak zawn hnuah November 27 khan Aizawlah Sandeep Singh Bhatti lakah a tlawm.

Kawng hrang hrangah Kaensa nen khaikhinin rin a kai zo lo viau a, chuti chungin WBA Asia Flyweight champion ni tawh leh world title chuh tawh Kaensa-a'n hnuhma leh sulhnu a neih tawhte ngaihtuaha a rilru tihbuai a tum lo tih a sawi.

'The Mizo Flash' Zotea chuan, "Thai boxer pakhat, ka hneh theih ngei tur nen kan intawng dawn a, chutiang rilru pu chung chuan hruihrual chhungah ka lut dawn a ni," tiin a sawi.

Kaensa hi vawi 21 chak tawhin ṭum thum a tlawm a, June tir kha a inhnek hnuhnun ber niin harsa lo takin a chak. Amaherawhchu, an khelh ṭhina flyweight aia rit super bantam-a inhnek tur an nih avangin Cherhlun tlangvalin hamṭhatna neih phah a inbeisei.

A beih tur Thai chhuanvawr Kiram hian January 2018 khan US-ah WBA welterweight title a chuh tawh a, Argentine boxer hmingthang Lucas Matthysse hneh loin hei hi a tlawm awm chhun a ni a, vawi 46 hnehna chang tawhin knockout-in vawi 33 a chak.

Welterweight huangah Indian professional boxer zinga dah san leh vawi thum WBC Asia champion ni tawh Neeraj Goyat chuan Rachata Khaophimai a nuai dawn a, Thai fighter Khaophimai hi vawi 12 a inhnek tawhah ṭum 11 chak tawhin ṭum khat chiah a tlawm a ni.