PSG midfielder thar Vitinha

Paris St-Germain chuan FC Porto midfielder Vitinha chu pound maktaduai 34-in an lalut a, French club-ah hian kum nga chhung khel turin contract a ziak.

Kum 22 mi midfielder hian 2020-21 season kha Wolverhampton Wanderers-ah loan-in hun a hmang a, match 22 inlanin goal khat a khungsak.

Season hmasa ṭan dawn khan Porto lamah a kir a, inelna hrang hrangah match 47 khela goal li khungin assist vawi nga a nei a, Primeira Liga leh Taca de Portugal-a an champion theih nan player pawimawh a ni.

Vitinha hi March thla khan Portugal tana inlan turin a vawi khat nan koh a ni a, ram tan match thum a khel leh der tawh - season hman zawh takah khan Primeira Liga team of the year-ah a lang bawk.

PSG hian nipui transfer-ah Vitinha hma hian Nuno Mendes an lo lalut tawh a, Portuguese full back hi season hmasa khan loan-in an lo hawh tawh a, Sporting Lisbon aṭangin £34mtd-in a nghetin an lalut zui ta a ni.

Champions League nomawi chawi châka tuihal PSG hian league nomawi chawi mah se coach Mauricio Pochettino chu a hna aṭangin an chawlhtir dawn nia sawi a ni a, he thu buatsaih lai erawh chuan Argentine coach hi PSG coach a la ni reng.

French chanchinbu lar L'Equipe-in an tarlan dan chuan PSG-a kum khat contract la nei mek Pochettino chuan Ligue 1 champion hi mawlmang taka chhuahsan tawp a duh bik lo a, an inrem lawk thei lo.

Mahse, tun hnai khan PSG chuan Pochettino leh a coaching staff-te chu an contract an tihtawp dawn avangin, zângnadawmna euro maktaduai 10 pek an rem ti a, Poch leh a naute hi an chhuak dawn.

PSG hi Zinedine Zidane-te nen pawh sawi zawm ni hman mah se Christophe Galtier chuan a enkawl dawn nia sawi a ni a, he thuziak i chhiar meuh chuan an inlalut fel tawh hial mai thei.

Season hmasaa Nice enkawltu Galtier hian 2020-21 season khan Lille chu Ligue 1-ah rin loh takin champion nomawi a chawipui a, Ligue 1 manager of the year-ah ṭum thum thlan a lo ni tawh bawk.

Chutihrual chuan PSG nomawi duh ber Champions League-ah erawh Galtier hian chhuan tur a la nei bik lo a, Lionel Messi leh Kylian Mbappé te ho enkawl turin a ṭha tawk em, tih chu hunin a hril thuai ang.