Titau turin Lewy a inpeih!

Bayern Munich striker Robert Lewandowski chuan Barcelona zawm ngei a tum a, Spanish chanchinbu Marca chuan Catalan club a zawmna tur hi tihfel thuai a nih loh chuan club training pawh zawm a tum lo niin an sawi.

Kum 33 mi striker hian ualau takin German champion chhuahsan a duh thu hi a lo sawi tawh a, Polish striker goal khung thei bik hian a chhuak a nih chuan Barca zawm a duh bawk.

Season hman zawh taka Bayern tana goal 50 zet khungtu striker hian German club-in pre-season an ṭan hun July 12-ah training a tum lo a, a agent hlui Mail Barthel chuan, "Training-naah a inlan ka ring lo," a ti a, Borussia Dortmund aṭanga Bayern Munich zawm a tum ṭuma a chet dan bawka a chet a ring!

Hetihlai hian Bayern hono­rary president Uli Hoeness chuan, "Training zawm duh lo turah chuan kan ngai lo. Contract a nei a, dan hnuaia awm kan ni. Amah thlakna tur striker kan hmuh loh chuan kan chhuahtir lo ang, tiin thu­tlukna kan siam sa tawh," a ti.

German chanchinbu Bild-in an tarlan dan chuan Catalan club-in Bayern an dawrna hnuhnung ber chu German club hian an lo hnar leh a, Lewy hma hun a chiang lo chhunzawm zel.

Khawthlang media-te tarlan dan chuan Barcelona hian Lewy manah hian euro maktaduai 40 pek phawt a, a khelh ṭhat dan a zira euro maktaduai nga pek belh turin Bayern hi a vawi thum nan an dawr.

Mahse, Bayern hian an striker chhuanvawr hi a kum tam deuh tawh mah se €50mtd an la chhiar a, Barca chuan an lalut duh a nih chuan an sum phut zat chu an pek tlak nghal vek an beisei bawk - awlsam taka Lewy chhuahtir an tum lo.

Barcelona hian Bavarians phut ang zat sum hi an theh chhuak ngam ang em, tih chu zawhna awm mek a ni a, tun hnaiah an television rights hralhna aṭanga sum an hmuh belh nual avangin an sum dinhmun chhe lutuk erawh a ziaawm ve leh deuh tawh - midfielder Frenkie de Jong chu man man deuh takin Manchester United-a kaltir an tum bawk.

Hetihlai hian Lewandowski hi Ibiza-a restaurant pakhatah Barca coach Xavi nen hmuh dun an ni a, Barca hian Bayern phut zat an thehchhuak thei a nih phawt chuan Lewy hi an chan ngei a rinawm.

Lewy hian Bayern-ah hian season khat dang châm turin contract a la nei mek a, Bayern hian Liverpool aṭangin Sadio Mane an lalut tawh bawk.