Salah-a'n khaw dang a hawi lo ; Contract thar a ziak!

Nipui transfer-ah Liverpool fan-ten hlimna tur an nei leh ta - chhuak tur anga sawi thawm a awm reng hnuah Mohamed Salah chuan contract thar a ziak a, Premier League defender rual tan hriat a nuam lo ang.

Salah hian kum thum chhung atan contract thar a ziak a, June 2025 thleng Anfield-ah a châm dawn tihna a ni - kar khatah £350,000 chuang a hlawh dawn a, Liverpool chanchinah ani aia hlawh hnem an la awm lo.

Egypt international hian contract thar a ziah hma hian Anfield-a châm turin kum khat chiah contract a nei tawh a, hlawh chungchanga an inrem lawk theih loh avangin club dang a pan mai rinna a lian hman hle.

Mahse, Sadio Mane an chân hnuah Reds-in Salah chân an duh tawh lo a, an player hlawh hnem ber ni turin contract thar an ziahpui. Liverpool hian Mane thlakna turin Darwin Nunez an lei tawh bawk a, tlarhmaah chuan an ngaih a ṭha tawh khawp ang.

Liverpool fapa
Reds boss Jurgen Klopp chuan, "Kan tana thutlukna ṭha ber a nih rualin a tan pawh thutlukna ṭha ber a ni. Ka ngaihdanah chuan Salah hi chu kan hnena awm tur reng a ni a, hei hi a club chu a ni," a ti a, a thiampuipain contract thar a ziak chu a hlim hle.

June 2017 khan Salah hian Liverpool hi AS Roma aṭangin a pan a, pound maktaduai 36.5 man niin, £43mtd thlenga a man hi sang chho thei tura tih a ni - a khelh dan leh hlawhtlinna en chuan Reds hian a man hi an pek belh tawh ngei a rinawm.

Klopp chuan, "Kan fan-te tan kartawp hlim taka hmanna tur chanchinthar lawmawm a ni a, zaninah hlim takin he thu lawmawm hi an lawm ka ring a ni," tiin Salah an chelh thei chu club tan thil lawmawm a nih thu a sawi.

Salah hian Liverpool-ah kum nga hun a hmang tawh a, inelna hrang hrangah match 254 khela goal 156 khungin assist vawi 63 a nei bawk a, a record a theuneu lo hle.

Nomawi beiseina
Egyptian King hming lem an pek Salah-a'n Liverpool-ah nomawi chawi theih a chawi kim tawh a, Champions League, Premier League, FA Cup, League Cup, FIFA Club World Cup leh UEFA Super Cup-ah te champion nomawi a chawipui vek.

Salah chuan, "A nuam ka ti a, he club tana nomawi chawi hi nuam ka ti. Mi zawng zawng tan vawiin hi hun hlimawm a ni a, kan hmaa inchhawp nomawi chawi vek turin theihna kan nei a ni," a ti a, Reds-ah hlawhtlin zel a tum.

Kum 30 mi Salah hian Reds-a a châm chhungin Premier League golden boot pathum a dawng tawh a, PFA player of the year-ah vawi hnih thlan a ni a, uanpui tham khawpin a che ṭha.

Klopp chuan, "Mo hi a hma aia kum ṭha zawk a tan a la her chhuak zel ang tih ka ring tlat a, season nga a hun hman tawh kha legend sulhnu a nih avangin hei hi a sawi ngam a ni," tiin a forward a ringtawk hle.

Hahdam rawh u!
Liverpool sporting director thar Julian Ward chuan Salah hi a nipui chawlh hman meknaah contract thar ziahpuiin turin a pan a, Liverpool neitu Fenway Sports Group president Mike Gordon chu inbiaknaah hian a thawhhlawk viau bawk.

Gordon leh Ward hian kumtir lam khan Salah hi Miami-ah inbiakna an lo neihpui tawh a, hemi ṭum hian a hlawh chungchang hi sawi a ni tawh.

Salah chuan, "Contract thar ziak turin hun a duh deuh hlek a, mahse, tunah chuan engkim tih fel a nih tak avangin kan hmachhawp lam kan thlir a hun leh tawh. Tun hnai kum nga/kum ruk chhung hian club chuan hma lam a pan zel tih in hmu ang.

"Season hmasa pawh khan nomawi pali kan hnaih hle a, season tawp karah pahnih kan hloh ta mai zawk a ni. Player thar lakluh kan nei bawk a, theihtawp chhuah a, tum mumal kan neih a ngai a, a êng zawnga thlirin nomawi zawng zawng kan beisei leh a ngai a ni," a ti a, beiseina a nei sang hle.