Ronaldo-a'n Old Trafford chhuahsan a duh

Manchester United forward Cristiano Ronaldo chuan Old Trafford chhuahsan a duh a, season thara Europa League khelh ai chuan Champions League khel tur club-a kal a duh.

Ronaldo hian United-a châm turin kum khat chhung atan contract a la nei a, a ṭul dan a zira kum khat dang la pawhsei theih tur a ni - mahse, Ronaldo beisei angin thil a thleng lo.

United hi season hman zawh takah khan Premier League-ah parukna an ni a, Champions League an khel dawn lo - kum 37 mi ni tawh Ronaldo hian a career tawp lama Europa League khelh a châk lo a ni ber.

Ronaldo sulhnu
Kum 37 mi ni tawh mah se Ronaldo hi season hman zawh takah khan United top scorer a la ni thei - inelna hrang hrangah match 38 khelin goal 24 a khung a, assist vawi thum a nei bawk.

Hei vang hian Ronaldo duhtu hi tam tak an la awm ang tih a chiang - Chelsea, Bayern Munich leh Napoli hming lam rik a ni a, kum tam tawh mah se duhtu a la nei hraw hle.

Ronaldo hian a hming chherna United a zah avangin uchuak taka chhuah tuma chet a tum hran lo a, mahse, Portuguese forward hian chhuah ngei erawh a duh - tun kara pre-season training nei turin United a zawm rin a ni a, Thailand leh Australia-a pre-season tour-ah zin tura beisei a ni bawk.

United tan hlawkna?
Red Devils-in Ronaldo hralh tumna an nei lo nia sawi a ni a, manager thar Erik ten Hag chuan Portuguese forward hi a ruahmannaa a tel thu a lo sawi tawh bawk. Mahse, tunah Ronaldo-a'n chhuah a duh tlat!

Hetih rual hian Ronaldo chhuak tur hi United tan hlawkna a ni thei - captain Harry Maguire nen kum tir lam khan an inhmuthiam lo nia sawi a ni a, coach lailawk Ralf Rangnick chuan pressing game khelh duh mah se Ronaldo hian a duh lo bawk.

Hei chauh a ni lo - Real Madrid legend hi Premier League player zinga hlawh hnem ber a ni mek a, kar khatah £550,000 a hlawh - heti zat kar khata player pakhata sen ngai lo tur hi United tan tun transfer bazar-a sum sen huai tirtu a ni ve thei.