Thailand-ah OP-a leh Zotea an chak
The Fighter World Boxing Series, Bangkok, Thailand-a neihah Mizo boxer pahnih Vanlalawmpuia leh F. Zoramchhana ten an khingpui ve ve an hneh a, India ram pawna professional boxing an khelh hmasak berah sulhnu hriatreng tlak an hnutchhiah.
Khuangthing tlangval OP-a hian Thai boxer Aekkawee Kaewmanee chu an khawtual ngeiah a hneh a, round ruk an inhnek chhungin a chak zawk - professional fight vawi nga a hmachhawna vawi li a chakna a ni a, vawi khat draw result a nei.
Spaceplus, Bangkok-ah Zotea'n rin hlawh lo zawk mah se amah aia tawnhriat nei ṭha zawk laka chak turin harsatna a tawk lo a, WBA Asia flyweight champion meuh lo ni tawh Yutthana Kaensa nen round ruk fight an nei a, a chak zawk.
Main event-ah Thai chhuanvawr Tewa Kiram chuan WBA Asia super welterweight title hlawh turin Afghan boxer Mohammad Zamani chu round 10 inhnekah a hneh a, Indian boxer lar Neeraj Goyat chuan round hnihnaah technical knockout-in Thai tlangval Rachata Khaophimai a hneh a, hmeichhe inhnek awm chhunah Delhi nula Shivani Dahiya chuan Thai mi Sundania Looksaikongdin a hneh bawk.
The Animal
Kum 25 mi OP-a hian fight vawi li a lo hmachhawn tawhah vawi thum hnehna a chang a, technical knockout hmang vekin a ni - nikum khan Sagar Chaudhary nen an inhnehtawk a, a record a chhe lo.
'The Animal' hming lem an pek boxer-in a hmachhawn Kaewmanee hi kum 40 mi a ni tawh a, tawnhriat pawh a nei ṭha hle - vawi 40 fight a hmachhawn tawh a, vawi 24 hnehna changin vawi 16 a tlawm.
Mahse, amah aia tawnhriat nei ṭha zawk boxer lakah OP-a a zam lo - round ruk chhungin a hnek chhuak tam zawk a ni a, Thai boxer hian inven chu hnapui berah a nei.
Kum 40 mi Kaewmanee hian a hman thiam lam, a kut vei lamin hnek ve ṭhin mah se Mizo tlangval tihbuai nan a tawk lo a, a tawpah OP-a a chak.
A hming Zotea
Bangkok khawpuiah Cherhlun tlangvalin lawm avangin a kut a phar a, Thai boxer Yutthana Kaensa a hneh vang a ni - Spaceplus-a inhnek entuten mak tiin an thlir a, a awm lo hran lo.
Zotea hneh tak Kaensa hi WBA Asia flyweight champion meuh ni tawh a ni a, WBA world flyweight title thlenga lo fight tawh a ni - vawi 25 meuh fight a hmachhawn tawhah vawi 22 a chak a, vawi thum a tlawm thung.
Mahse, ring chhungah Zotea'n Kaensa a ṭha tih a hre lo a, bantamweight huanga round ruk an inhnek chhungin a chungnung tluan.
Nikum a, Aizawl khawpuia Sandeep Singh Bhatti laka tlawm Zotea'n hnehna hlado a chham leh ta a, vawi li inhnek a hmachhawna a vawi thum chakna a ni - mak ve deuh chu a fight hoah hian point hmang vekin a chak.
Enge an sawi?
Mizo boxer rothap OP-a chuan, "Mizo mipuite min thlawpnaah lawmthu ka sawi a, LPS, Marine Pro Boxing Promotion leh Sete Boxing Academy-te thawhhona zara international fight nei thei ka ni tih ka hria a, an chungah lawmthu ka sawi bawk," tiin Vanglaini a hrilh.
Mizoram boxer zinga fight hmuhnawm ber pawla chhal ngam Zotea chuan, "Mizo mipuite min thlawpna zawng zawngah lawmthu ka sawi a, hmabak a la hautak zel dawn avangin min thlawp zel turin ka ngen duh bawk.
"Tun dinhmun ka thlen theihna chhan leh kan fight theih nana pawimawh em em LPS chhungkua chungah lawmthu ka sawi a. Sete boxing academy ten kawng engkimah theihtawp min chhuahpui a, coaching staff-te zawng zawng chungah lawmthu ka sawi.
"Kan khua Cherhlun mipuite kawng engkima min thlawpnaah lawmthu ka sawi bawk," tiin Vanglaini a hrilh.