Number 1 Iga Swiatek a tla
Wimbledon champion tura rinkai, tun hnaiah phei chuan hneh theih loh ang maia kaltluang Iga Swiatek zinkawng a tawp. Polish nula hi Alize Cornet hneh loin third round-ah a tla a, a zawna match 37 a chak tluan tawhna chu a tawp nghal bawk a ni.
Inrinni zan Court 1-a inkhelah, kum 21 mi Swiatek hi 6-4, 6-2 in a tlawm. World number 37 Cornet hi rinkai lo zawk ni mah se a khel ṭha, game hnuhnung paruk phei chu a la zawn thei hial, chak phu zawk a chak.
Uain ṭha mi
Cornet hi kum 32 mi a ni tawh, a kum chhut chuan a vanglai a pel tawh. Tun hma lama a la tih theih ngai loh tih tumin thapui a thawh a, kum upat lamah a khelh ṭhat avangin uain ṭha mi ang mai nia a inhriat thu a sawi.
World number 11 pawh lo ni ve tawh Cornet chuan, "Chak turin beiseina ka nei a, ka tih theih ka beisei ang ngeiin ka ti thei bawk. Swiatek inkhel ka lo zirchiang ve ṭhin a, court dang ai chuan grass-ah hian a khelh dan a hniam deuh hlekin ka hria.
"Chumi chu ṭangkaia hman ngei ka tum a, ka thil tum a hlawhtling thei hi ka lawm," a ti. Cornet hian 2014 khan, rin loh tak maiin khatih laia world number 1 Serena Williams chu a lo hneh tawh bawk a ni.
Cornet chuan sawi zawmin, "Kan ram France-ah chuan uain upa apiang a ṭha, chutiang chu ni maiin ka inhria," tiin a sawi. A match lehpekah chuan Ajla Tomljanovic a hmachhawn leh ang, inkhel hmuhnawm an chhawp chhuak leh ngei ang.
Gauff pawh a tla
Coco Gauff pawhin a tum ram a thleng thei dawn lo. American tleirawl hi a hnampui Amanda Anisimova lakah 6-7(4-7), 6-2, 6-1 in a chak lo. Florida aṭanga rawn chawr chhuak player pahnih hi tun hma pawhin an lo intawng tawh ṭhin.
US Open 2017 khan junior title an lo inchuh tawh, he inkhelah pawh hian Anisimova bawk a chak. Tun ṭum Centre Court-a inkhelah erawh Gauff hi rinkai zawk a ni a, inkhel takah erawh beisei angin a khel chhuak zo ta lo a ni.
Kum 20 mi Anisimova hian kumina Grand Slam pathum khelh tawh - Australian Open, French Open leh Wimbledon-ah last 16 a in vaw kai vek. Kum 18 mi Gauff tan erawh Wimbledon a khelh tawh china fourth round a thlen loh vawi khatna a ni thung.
Inkhel dangah Simona Halep pawh a chak. Romanian star hian Magdalena Frech chu 6-4, 6-1 in a hneh. A match lehpekah chuan Paula Badosa a hmachhawn leh dawn, inkhel dangah Badosa hian vawi hnih champion tawh Petra Kvitova chu 7-5, 7-6 (7-4) in a lo hneh ve bawk.