Vaivakawnin Electric an hmet thim

LBS Suzuki All Mizoram Inter Village Football Tournament 2022-ah team lian zinga chhiar tel theih Electric Veng chu Vaivakawn hneh loin an tla.

Inrinnia Lengpuia inkhel dangah S. Malsawmtluanga enkawl Chhinga Vengin Pangzawl 7-0 in an hneh a, last 64-ah Chhinga Veng leh Vaivakawn an inhmachhawn ang.

Tun ṭum inelnaah hian group D-ah team ṭha an ṭhahnem a, 'Group of Death' lamah hian round sang zawk thleng pha lo team ṭha an awm nual dawn.

Apuia veng Vaivakawn
Vaivakawnin an match hmasa berah Kawrtethawveng 1-0 in an hneh hram a, team ṭha zinga chhiar an rem lo. Amaherawhchu, Vaivakawn hian India international Lalengmawia Ralte (Apuia) leh Hyderabad FC goalkeeper Lalbiakhlua Jongte an kawl bakah coach tawnhriat nei ṭha Lalruatliana Sailo (Tawia) an nei bawk.

Tawia hote hi eng team pawh hneh turin theihna an nei a, Electric Veng lakah an theihna an pholang. Chutihrualin Electric Veng vanduaina chu Lengpui boruak an vawi khat temna an ni a, Vaivakawn-in khelmual leh boruak awm dan an hrethiam tawh.

Vaivakawn an vannei
Electric Vengin bul an ṭan ṭha a, Mizoram Police winger Lalbiakhlua hmangin minute rukna lekah an khung. Amaherawhchu Vaivakawnin corner kick an hmang ṭangkai a, U Dream hnuaia Germany-a football zir tawh Moody Lalawmpuia hmangin minute thum hnuah an sut.

Electric Veng an insiamrem thei lo a, Vaivakawn tana corner kick pettu Vanlalhriata freekick pet aṭangin David Lalrinpuia'n minute 13-naah hmahruaina goal a khung.

Inkhel a nung a, team ṭha inkhel an nih avangin entu pawh an ṭha. Minute 64-naah Lalchhuansanga hmangin Electric Vengin si phurh an sut a, chak thei mai turah an inngai. Mahse, Vaivakawn keeper Biaka a ding khawng ve tlat.

Team ṭha pahnihah Vaivakawn an vannei ta zawk a, minute 72-naah Moody-a'n chakna goal a khung. Electric Vengin an nawr na a, Santosh Trophy-a Mizoram champion puitu vice captain V. Lalṭanpuia (Ṭ-a) pawhin si phurh sut teuh mah se a vannei bik lo.

Vaivakawn tan captain Apuia'n team a ho ṭha a, 3-2 in an chak. Coach Lalruatliana Sailo chuan, "Chak lo ilang chuan vanduai kan inti ang a, chutiang bawkin Electric Veng pawhin vanduai an inti ang," tiin a sawi.

Electric Veng coach Vanlalsawma Colney chuan, "Ka nauten football-ah hmabak eng tak an nei. MPL-ah Electric Veng tan an khelh chhunzawm a ngai. Inkhel bikah erawh kan vanduai ka ti a, first round kan bye kha kan chhiatpui a ni," tiin Vanglaini a hrilh.

Mama hote an ṭha
Inrinni khan a vawi khat nan Chhinga Veng an inlan a, S. Malsawmtluanga hote hian coach Chawngthansanga enkawl Pangzawl chu 7-0 in an sawp.

Chhinga Veng tan hian C. Lalchungnunga'n goal hnih a khung a, ISL player Rochharzela bakah F. Lalnuntluanga, Lalremruata, C. Zodinsanga leh veteran Lalhlimthara ten goal khat ṭheuh an khung.

Chhinga Veng hian third round-ah Electric Veng hnehtu Vaivakawn an hmachhawn dawn a, inkhel hmuhnawm tak thlir tur a awm dawn.