Armed Veng bul ṭanna goal nga

Central YMA Football-a record nei ṭha ber Armed Vengin LBS Suzuki All Mizoram Inter Village Football Tournament-ah an match hmasa ber an khel a, Keifang 5-2 in an hneh.

Armed Veng hi Mizoram Police coach Lalbiaksanga (BS-a) enkawl an ni a, champion tura rinkai an ni. Match hmasa berah erawh Armed Veng hi an khel ṭha tawk lo a, goal nga thun mah se vanduai thei dinhmunah an ding.

Armed Veng tan R. Lalhriatzuala, Lalbiak-hlua, Lalawmpuia Hnamte, Lalfakzuala leh Lalmuanzova ten goal khat ṭheuh an khung a, amaherawhchu Keifang hian Armed Veng tlarhnung an ṭhiat ngun hle.

Keifang tan hian Lalnunmawia leh Jerry Lalchhanchhuaha ten goal an khung a, 3-2 a nih hman avangin Armed Veng pawh an talbuai hman. MZU Ground-ah Lalramchullova awm loh a lang a, Armed Veng tlarhnung a phui lo. Third round-ah erawh team ṭha Armed Veng hi an insiamrem theih beisei a ni.