CAF Awards: Salah leh Mane hming a lang
Confederation of African Football (CAF) Men's player of the year award dawng tura hming chhawp chhuah zingah Mohamed Salah leh Sadio Mane hming a lang a, he chawimawina dawng thei tur hian player 30 hming chhawp chhuah a ni.
Bayern Munich player thar Sadio Mane hian Senegal chu AFCON nomawi a chawipui bakah World Cup a inpetkai pui bawk a, he hlawhtlinna chang tur hian Egypt ve ve an hneh a ni.
Senegal hian Mane bakah player pali an thawh a, Chelsea goalkeeper Edouard Mendy, Leicester City midfielder Nampalys Mendy, Ligue 2 club Nancy player Saliou Ciss leh Napoli centre back Kalidou Koulibaly te hming pawh a lang.
Algeria superstar Riyad Mahrez pawh hming chhawpchhuah zingah a tel a, ani hian Premier League-ah Manchester City chu a champion pui - chhuan tur dang erawh a nei tam lo.
Salah & Mane
Nomawi chawi aṭanga teh tur a nih chuan Salah aiin Mane a hlawhtling zawk - player pahnih hian Liverpool tan FA Cup leh League Cup nomawi an chawi ve ve a, mahse, ram tan Mane a hlawhtling zawk.
Mane hian World Cup a khelh dawn bakah AFCON-ah Senegal a champion pui a, CAF player of the year chawimawina sem hnuhnun ber, kum 2019 khan a dawngtu a ni bawk - Covid-19 vangin sem chhunzawm loh a ni ta reng a ni.
Mahse, Salah hian Premier League-ah goal khung hnem ber niin goal 23 a khung a, Tottenham Hotspur striker Son Heung-min nen goal khung zat inangin Golden Boot an dawng dun.
Salah hi PFA Fans leh Players' player of the year-ah thlan a ni ve ve a, Football Writers' Association player of the season-ah thlan a ni bawk - mimal ang chuan Mane aiin a che ṭha zawk.
Beisei aia sang
CAF Men's player of the year award dawng thei zingah ram langsar lo tak Gambia (Musa Barrow) leh Comoros (Youssouf M'Changama) ten player an thawh ve nawlh a, AFCON-a an chet ṭhat rah an seng.
Gambia hian AFCON-ah khan quarterfinal an lut a, Comoros hian round of 16 an lut bawk - team pahnih hi inelna thlengtu Cameroon chuan an pet chhuak ve ve a ni.
Musa Barrow hi Serie A club Bologna tana khel lai a ni a, Youssouf M'Changama hi Ligue 2 club Guingamp tana khel lai a ni a, season tharah Ligue 1 club Auxerre tan a khel dawn.
Hetihlai hian AC Milan tana Serie A nomawi chawitu, Ivorian midfielder Franck Kessie leh Moroccan full back Achraf Hakimi (PSG) te pawh an lang a, AFCON tournament khata goal riat khung hmasa ber, Cameroon striker Vincent Aboubakar a lang bawk.
A thlangtu
CAF Men's player of the year award dawng tura player chhawp chhuahte hi CAF legend, technical expert leh journalist ten an thlang a, September 2021 aṭanga June, 2022 thlenga an khelh dan en a ni.
Category tina award dawng tur chu CAF technical committee, journalist, CAF hnuaia ram tin coach leh captain bakah Africa khawmualpui club inelnaa tel phak club coach leh captain ten vote hmangin an thlang ang.
CAF chuan mipa player ṭha ber bakah hian young player leh coach of the year an thlang tel dawn bawk a, hmeichhe player ṭha ber pawh thlan a ni dawn bawk.
Hmeichhe player ṭha ber dawng thei tur nominee erawh chhawpchhuah a la ni lo a, chhawpchhuah vat a ni dawn thung - award hi July 21-ah semchhuah a ni ang.
