Quarterfinal-ah Djokovic a lut

Wimbledon champion lai Novak Djokovic chuan quarterfinal a in vaw kai. Serbian star hian Pathianni zan khan wildcard hmanga inlan Tim van Rijthoven hnehin last 16 a paltlang, a match lehpekah Jannik Sinner a hmachhawn dawn.

Italian rawlthar Sinner hian champion tura rinkai ni phak Carlos Alcaraz a lo hneh ve bawk a, zanin quarterfinal-a seeded pakhatna Djokovic nen an inkhel tur hi a hmuhnawm ang, chak zawk tur rinthiam a harsa.

Last 16 inkhel dangah David Goffin chuan, darkar li chung an inbeih hnuin Francis Tiafoe chu 7-6 (7-3), 5-7, 5-7, 6-4, 7-5 in a hneh. 2019 quarter finalist hian tualchhung tlangval Cameron Norrie a hmachhawn leh dawn a ni.

Novak a ṭha
A zawna a vawi li nan champion a tum a, a hma a ding apiang a hneh zel. Djokovic-a'n service nei ṭha tak Rijthoven lakah pawh zahngaihna a lantir chuang lo, darkar hnih leh minute 39 an inkhelh hnuah 6-2, 4-6, 6-1, 6-2 in a chak.

World number 104-na Van Rijthoven-a'n set hnihna a lak laiin mipui thawm a ṭha hle, mahse Grand Slam vawi 20 champion tawh Novak-a'n a hnu lamah a theihna tak a pholang a, a vawi 13 nan Wimbledon quarterfinal a khel dawn ta a ni.

Wimbledon match 25 chak zawn tawh Djokovic chuan, "Tun hmain kan la inhmachhawn ngai lo, chuvangin inkhel awlsam a ni lo hle. A service a nain a ball vuak a dik thei hle, hmabak eng tak a neiah ka ngai," tiin Tim van Rijthoven chungchang a sawi.

Sinner a tlang
Sinner hi kum 20 mi a ni a, a khingpui Alcaraz pawh kum 19 mi chauh a la ni. Player pahnih hi an kum la naupang deuh mah se theihna an nei sang a, season an hman dan chhut chuan tun ṭumah hian champion tura rinkai zingah an tel phak.

Mahse, pakhat zawk a tlak a ngai si. Sinner-a'n kawng hrang hrangina theihna sanzia a lantir a, darkar thum leh minute 35 an inkhelh zawh chuan 6-1, 6-4, 6-7(8), 6-3 in a dingchang zawkah a ṭang, tun chauh lo pawh inelna hmuhnawm an la chhawp chhuak leh ṭhin ngei ang.

Italian player Sinner chuan, "Grass-ah hi chuan court dang aiin ka ṭha tawk lo tih ka hria. Mahse, match hmasa berah ka chak a, tunah chuan quarterfinal hial ka thleng ta. Fans puihna ka dawn ṭhat bawk avangin inkhelh pawh nuam ka ti hle," a ti.