Zarkawt BCA hmaah Khatla TBL

Mizoram Super League hmawr bawk a hnai. Zanin dar 8:30 hian champion lai Zarkawt BCA leh Khatla TBL ten 'Play In' an khel dawn, league hmahruaitu BCA tan final lut turin chak a tawk.

Table-a pahnihna Khatla TBL erawh an chak a nih pawhin an la tlang mai dawn lo, an chak a nih chuan vawi khat an inkhel leh ang - chuta chak zawk chu an tlang dawn a ni. Play in kalphung hi siamsa a ni, league hmahruaitu nih a pawimawh hle.

Tualchhung player ṭha - Lalrina Renthlei, Matthew Ramtluanga Sailo leh Zonunsanga te awmna team hi rinkai an ni dawn. Anni pathum ti chak zual tur hian Joseph Fredrick Allen an nei. US lama inzir tawh Lalhnehpuia Chhakchhuak an la nei cheu bawk.

BCA coach Lalruatfela'n an tualchhung player-te an pawimawh thu Vanglaini a hrilh tawh, zaninah pawh TBL hneh an duh a nih chuan state pawn player ai chuan Mizoram hrechiangtute an pawimawh leh ang.

Team pahnih intawn hnuhnungah BCA hi 76-77 in an chak lo, he inkhel hi June 29, Nilaini ami mai kha a la ni. Vawi hnih champion tawh TBL hian champion lai hneh turin theihna an nei sang, zaninah pawh hlauh nei loin an inlan dawn.

TBL-in tun hmain mimala point nei hnem thei player an chah lut ṭhin, kuminah erawh point bakah assist nei thei Levi Bradley Jr. an chah lut thung. League round an khelh tawh chinah ṭhiante tan a khel hnem, hei hi an ṭhat pui ni pawhin a lang.

Coach Vanlal-nunsanga chuan, "BCA hi team ṭha an ni, mahse theihtawp kan chhuah dawn. Team game a ni a, thawhhona ṭha a pawimawh," tiin a sawi, zaninah team game hmuhnawm khel chunga Zarkawt team hneh ngei an tum dawn.

MSL Play In Fixtures
July 4, Thawhṭanni
MSV Hotshots 08:30 PM Tuikual South
(Nizan inkhel result kan hre hman lo)
July 5, Thawhlehni
Zarkawt BCA 08:30 PM Khatla TBL