Arsenal player thar Gabriel Jesus

Gabriel Jesus chuan Manchester City aṭangin Arsenal a zawm fel ta. Brazlian forward hi pound maktaduai 45 man niin, Emirates Stadium-ah kum nga chhung cham turin contract a ziak, nimin chawhhnu lam khan player thar hi tlangzarh a ni.

Mikel Arteta-a'n tun nipui bazar chhungin player pali a lakluhna chiah a ni. Jesus hma hian midfielder Fabio Vieira, goalkeeper Matt Turner leh Brazilian striker Marquinhos te an lo lalut fel tawh bawk.

Gunners manager Arteta hian Man City assistant coach a nih laiin Jesus hi a lo enkawl tawh, an inhrechiang hle ang. Arteta chuan, "Gabriel hi mimal tak pawhin ka hrechiang. Premier League hrechiangtu a ni a, kan hnenah a hlawhtlin theih ka beisei.

"A khelh ṭhinna hmuna khel tur hi hun rei tak chhung chu kan zawng tawh, kan mamawh leh duh tak ani kan lalut thei hi ka lawm," a ti. Jesus hian jersey number 9 a ha dawn a, tlarhma laiah a khel ang.

Man City-ah kum nga leh a chanve a cham chhungin, match 236 khelin goal 95 a khung. Premier League nomawi panga bakah League Cup pathum leh FA Cup a chawipui hman a, a hlawhtling hman hle.

Kum 25 mi Jesus chuan, "England ram ka rawn pan tirh ai khan tunah hian ka ṭha zawk tawh. Man City tan nomawi 11 ka chawi hman a, ka tan chuan thil lawmawm a ni. City tana ka khelhpui, coach leh player bakah min ṭantu fans chungah lawmthu ka sawi," a ti.

Season hmasa khan Jesus hian league match bikah assist vawi riat a nei, midfielder ṭha Kevin de Bruyne nen Manchester City player zinga assist ngah an ni, goal khung chauh ni loin a siamsak thlengin a ṭangkai dawn.

Pep Guardiola-a'n tlarhmaah chuan a lai bakah a sir tawn tawnah a chhawr kual ṭhin, player ṭha tak ni mah se a duhkhawp lo. Spanish manager hian Borussia Dortmund aṭangin Erling Haaland chu pound maktaduai 51.2 in an lalut.

Haaland bakah hian Argentine player Julian Alvarez chu khelhna hmun siamsak a tum bawk. Man City thlarhma lamah duhthlan tur an tam, khelhna hmun chan tam duh Jesus a chhuah a ngai, striker Eddie Nketiah nen khelhna hmun an inchuh a la ngai dawn tho.

Beisei a neih thu sawiin Jesus chuan, "Mikel lakah rinna ka nghat ngam, 100%-in ka ring. Ani nen hian hun hlimawm kan lo hmang dun tawh, mi ṭha tak leh coaching lamah pawh ṭha tak a ni. Hma ka sawn theih nana min puitu pawimawh a ni bawk," tiin a sawi.

Arteta-a'n team nghet tak din a tum a, chumi kawngah chuan rawlthar rual a chhawr nasa. Season hmasa lama an player rinrawl ber Bukayo Saka chu kum 20 mi chauh a ni a, kum 21 mi Emile Smith Rowe te nen Jesus hi an inkawp ang.