India leh England inhnehtawk

FIH Women's Hockey World Cup-ah India leh England te chu an match hmasa berah 1-1 in an inhnehtawk. Lalremsiami Hmar telna India hian zanin dar 8:00 hian China an hmachhawn lehnghal ang, inkhel hi Star Sports 1 leh Hotstar-ah live a en theih a ni.

Pool B inkhel dangah Pathianni zan khan China leh New Zealand te 2-2 in an inhnehtawk ve bawk, an inkhelh kual vek hnuah a sang berin quarterfinal an lut dawn. India hian England laka point an hmuh avangin knockout stage beiseina a sang.

Wagener Hockey Stadium, Netherlands-a inkhelah, Olympic bronze medal latu England tan Isabella Petter chuan minute kuana lekah goal a khung a, minute 28-naah India tan Vandana Katariya chuan sutin goal dang a lut zui tawh lo.

Mizo nula Remsiami'n inkhel bul a ṭan a, player ṭangkai leh thawhhlawk zinga mi a ni. India hian penalty corner vawi ruk an hmuh zinga pakhat chiah goal atan an chantir thei a, hun ṭha an bawhpelh hnem avangin an vanduai tia sawi theih a ni.

India coach Janneke Schopman chuan, "A tir aṭangin kan khel ṭha, minute khatna lekah penalty corner pawh kan hmu nghal. England kha team ṭha tak ni mah se hmachawn dan kan thiam a, goal khat aia tam kan khung lo kha a uiawm.

"China leh New Zealand te kan la hmachhawn leh dawn. World Cup khel chin chu team ṭha vek an ni, chutih rualin anni hneh turin kan team hi kan ṭha tawk, nuamti takin kan khel ang," tiin a sawi.

India first XI:
Savita (C, GK), Deep Grace Ekka, Udita, Nikki Pradhan, Sushila Chanu Pukhrambam, Salima Tete, Neha, Navjot Kaur, Lalremsiami, Navneet Kaur, Vandana Katariya

Pool A: Netherlands, Germany, Ireland, Chile
Pool B: India, England, New Zealand, China
Pool C: Argentina, Spain, Korea, Canada
Pool D: Australia, Belgium, Japan, South Africa

India Fixtures
July 3, Pathianni
India 1 - 1 England
ENG: Isabella Petter 9'
IND: Vandana Katariya 28'
July 5, Thawhlehni
India 08:00 PM China
July 7, Ningani
India 11:00 PM New Zealand