Round of 64 - Team ṭha tla an awm dawn

LBS Suzuki All Mizoram Inter Village Football Tournament-ah vawiin ṭangin team 64 awmna third round khelh ṭan a ni dawn a, inkhel hmuhnawm thlir tur a awm dawn. Knockout inelnaah chuan fixtures fuh leh fuh loh kar a hla a, team ṭha zingah round of 32 thleng pha lo an awm dawn.

MFA Ground
Sairang Dintharah Zawlnuam Bawrai leh Thiltlang ten dar 9:00-ah bul an ṭan dawn a, chawhma dar 11:00-ah Darlak leh Farkawn ten an chhunzawm ang. Zawlnuam Bawrai leh Farkawn te hi chak tura rin zawk an ni.

Tlai dar 1:00 aṭangin hmuhnawm a inṭan dawn. Coach Lalrindika Hmar enkawl Salem Veng leh Hualngohmun te an inhmachhawn ang. Salem Veng hian MPL U18-a best player Laldanmawia, best goalkeeper Joel B. Lalramchhana, best forward Lalnunzira te an kawl.

Hualngohmun lamin MPL-a khel thei player panga an nei. Chung zingah chuan ke vei lama ball pet thiam bik Vanlalthanga leh Mizoram Police defender Lalhmunmawia (Ahmuntea) te an langsar a, inkhel a hmuhnawm dawn.

Match tawp berah Venghlui leh Chanmari an inkhel dawn. Chanmari hian MPL club an neih bakah CYMA Football 2019 champion an ni a, chak zawk tura rin ni mah se Lalmuansanga leh K. Mama te telna Venghlui hi chetsual theihna an ni ang.

Lammual lam
Lammualah inkhel pali tho a awm dawn. Dar 8:30 aṭangin inkhel a awm ṭan dawn a, chhun dar 12:30-a Khawzawl Vengthar leh Ramhlun South te inkhel tur chu inkhel hmuhnawm tur bera ngaih a ni.

Tualchhung football-a record nei ṭha Ramhlun South hian Malsawmfela te unau kawl mah se Jt VC Vairengte leh Mission Vengthlang an hneh dan thlirin team ṭha chungchuang tia sawi an harsa. An khingpui tur Khawzawl Vengthar hian player ṭha an neih bakah an result hmangin team ṭha an ni tih an pholang - rinkai zawk tih tur an awm lo.

Inkhel dangah Tanhril LC aiin Jt VC, Lawngtlai an buk a rit zawk a rinawm a, Hnahthial Jt tan Darlawng hneh a harsat a rinawm lo a, Reiek VC leh Sairang Dinthar VC erawh intluk tawk viau turah a ngaih theih thung.

Lengpui lamah chawhma dar 9:00-ah Lungdai leh Hriphaw an inkhel dawn a, Ṭumpui Kolasib leh Dawrpui Vengthar ten an inhmachhawn chhunzawm dawn. Zemabawk Derby thlir tur a awm dawn a, tlai dar 1:00-ah Zemabawk leh Zemabawk North te an inkhel dawn. Zemabawk North hi Samuel Lalmuanpuia leh David Lalrinmuana telna a ni a, match tawp berah Republic Veng leh Champhai Zotlang te an inkhel ang.