Vawiinah second round khelh zawh a ni dawn

LBS Suzuki All Mizoram Inter Village Football Tournament second round chu vawiin hian khelh zawh a ni dawn a, match li khelh hmabak hi RG Stadium, Mualpuiah khelh zawh a ni ang.

Match hmasa berah Tuithiang leh Kelsih te zing dar 8:00-ah an inkhel dawn. Kelsih hi an vawi khat inlanna tur a ni a, Tuithiang erawhin Biate 6-1 in an hneh tawh. Tuithiang hi coach Lalremruata enkawl a ni a, MPL-a player Ṭhasiama leh Lalhmangaihkima bakah player chhuak thar ṭha an neih avangin an buk a rit zawk ang.

Chawhma dar 10:00-ah Chanmari West leh Bilkhawthlir North te an inkhel dawn. Bilkhawthlir North hian Nursery Veng 3-0 in an hneh tawh a, tun ṭuma an hmachhawn tur erawh football khel thiam veng tia sawi theih Chanmari West an ni tawh thung. Chutihrualin Chanmari West-a footballer ṭha ṭhin ten football khelh an chawlhsan ṭan a, mi thar ṭha an chhuak bik lo.

Chhun dar 12:00-ah College Veng leh Thenzawl West te an inkhel dawn. Thenzawl West hian an match hmasa berah champion rinkai zinga mi Durtlang an hneh a, an thawm a ring nghal. College Veng hi Electric Veng FC coach hlui Ramlalthlamuanpuia (Sabito) enkawl a ni a, Thenzawl West dinhmun tak a hriat theih ang.

Chawhnu dar 2:00-ah Model Veng leh Saron Veng te an inkhel dawn. Tun hma lam record en chuan team pahnih hi intiat tawk tura ngaih an ni a, mah se tun ṭumah erawh Saron hi team ṭha pangngai an ni. An match hmasa berah Buangpui 6-0 in an sawp.

Vawiin Inkhel Tur
Khelmual : RG Stadium; Group B
Kelsih VC 8:00 AM Tuithiang LC
Chanmari West 10:00 AM Bilkhawthlir N VC
College Veng LC 12:00 Noon Thenzawl West VC
Model Veng LC 2:00 PM Saron Veng LC