Hma lam panin Ons Jabeur

Ons Jabeur chuan African player zingah Wimbledon champion hmasa ber nih a la tum zel. Pathianni zan khan Elise Mertens chu 7-6(9), 6-4 a hnehin quarterfinal a inhlangkai, a tum ram thleng turin match pathumah chak a la ngai.

Iga Swiatek leh Anett Kontaveit an tlak takah chuan Jabeur hi rinkai ber tia sawi ngam a ni. A match leh pek atan Marie Bouzkova a hmachhawn leh ang, inkhel dangah Bouzkova hian Caroline Garcia chu straight set hmangin a lo hneh ve thung.

Tunisian nula Jabeur chuan, "Ka tan chuan thil engkim mai hi harsa taka hmachhawn a ngai ṭhin ni berin ka hria. Kan khawmualpui aṭanga chhuak tan chuan Grand Slam khelh ringawt pawh hi thil awlsam a ni lo.

"Thil tum sang leh mumal tak neiin tournament ka hmachhawn, ka hmaah tu pawh rawn ding se theihtawp chhuahin ka bei zel ang," a ti. Seeded pathumna a nih phak avangin player dang atan hmachhawn châkawm lo zinga mi chu a ni ve bawk.