Ukraine nulaten futsal an thiam

UEFA Women's Futsal Euro 2022 chu khelh zawh a ni ta a, champion team Spain aiin pathumna dinhmun luahtu Ukraine hmeichhe team-in ngaihven an hlawh zawk!

Spain hian final-ah Portugal chu 3-3 a an inhnehtawkpui hnuin, penalty-ah 4-1 in an chak a, Ukraine hian pathumna inchuh inkhelah 2-1 in Hungary an hneh thung.

Russia-in Ukraine a run avangin Ukraine-in khawvel ngaihven a hlawh a, an ram boruak ipik tak kara European futsal inelnaa pathumna an ni thei hi a ropui hle.

Ukraine captain Iuilia Forsiuk chuan, "Medal kan hlawhchhuah hmasak ber a ni a, ka lawmzia hi ka sawi thiam lo zawk. Hei hi kan tan chauh a ni lo a, kan ram mipui tan a ni.

"Team dang chuan a kum tel inpuahchahna hun an nei a, keini erawhin thla khat chiah kan nei. Player ṭhenkhat chu ram pawnah an awm a, a ṭhen chu an inkhel mumal lo.

"Thla khat kan awm ho a, he hun kan thlen theih nana min puitu zawng zawng chungah lawmthu ka sawi a ni," a ti a, Ukraine player-te bianga mittui luang chu an lawmna hrilhfiahtu a ni.

July 3, Pathianni
Third Place
Hungary 1 - 2 Ukraine
HUN: Viktória Horváth 38'32''
UKR: Yuliya Tytova 8'27''; Snezhana Volovenko 22'53''
Final
Portugal 3 - 3 Spain
POR: Ana Azevedo 11'08''; Pisko 18'22'', 48'44''
SPA: Ale de Paz 19'34'', 34'02''; María Sanz 43'32''

* Penalty-ah 4-1 in Spain an chak
* Goal khungtu hming tawpa number hnunga ' & " hi minute leh second tihna a ni. Hungary tana goal khungtu Horváth hian minute 38 leh second 32-naah gpal a khung tihna a ni.