Forest an inthuamṭha zel

Premier League kai thar Nottingham Forest an inthuam ṭha zel a, French defender Giulian Biancone chu Troyes aṭangin pound maktaduai ngain an lalut ve leh ta - Ligue 1 club Troyes-in an player an hralh to ber a la ni.

Kum 22 mi Biancone hian Forest-ah hian kum thum chhung atan contract a ziak a, a boruak hip ngai lohna hmunah a theihna tak tak fiahin a awm dawn.

France Under-19 tana vawi sarih lo inlan tawh defender hian AS Monaco aṭanga a career ṭanin, 2019-2021 inkar kha Belgian club Cercle Brugge-ah loan-in a khel.

Season hmasa ṭan dawn khan Troyes hi a zawm ve chauh a, kum nga chhung atan contract a ziak - season hman zawh takah khan match 33 khelin goal khat a khung a, assist vawi hnih a nei.

Troyes hi Ligue 1-ah 15-na a nihpui a, season khat a khel hman awrh tihah Forest mit a tlung a, English football-a a theihna pholang turin an lalut ta.

Forest manager Steve Cooper chuan, "Position hrang hranga chhawr theih defender, centre back emaw right back emawa chhawr kawp theih a ni," tiin a defender thar hi a fak.

Premier League kai thar club hian season khat chhung atan Manchester United keeper Dean Henderson chu loan-in an lo lalut tawh a, Union Berlin aṭangin forward Taiwo Awoniyi chu club player man to ber ni turin an lalut tawh bawk.

Imperial Soccer Academy aṭanga inzir chhuak Awoniyi hian kum 2015 khan Liverpool zawmin a professional career zinkawng a ṭan a, mahse club pasarih zeta loan-a kal kualtir a nih hnuah nikum khan Union Berlin chu a nghetin a zawm.

Bundesliga club tan hian season hman zawh takah khan inelna hrang hrangah match 43 khelin goal 20 a khung a, Reds-in pound maktaduai 6.5 leka an hralh hi kum khat hnuah Forest hian £17mtd-in an lei.

Mahse, Reds hian Berlin-in an hralh lehna aṭanga 10% share neih dan an ziak tel a, Forest-in Awoniyi an lei hi an lo hlawkpui ve dawn tihna a ni.