City-in Kalvin Phillips an lalut ta

Manchester City chuan Leeds United midfielder Kalvin Phillips chu pound maktaduai 45-in an lalut fel ta a, kum ruk chhung atan contract an ziahpui.

Kum 26 mi midfielder chuan, "Manchester City ka zawm thei hi ka lawm takzet a, he rama team ṭha ber an ni - squad ṭha tak leh manager ṭha tak Pep Guardiola an nei a, Pep hi a phu ang ngeiin khawvela coach ṭha berah tam takin an ngai a ni," a ti.

England tana vawi 23 inlan tawh Kalvin Phillips hi 2020-21 khan England men's Player of the Year-ah thlan a ni tawh a, Leeds boss chhuak ta Marcelo Bielsa hnuaiah hmun pawimawh a chang ṭhin.

Season hman zawh takah erawh malpui hliam avangin a hun tam zawk khelmual pawnah a hmang a, league-ah match 20 chauh khelin chhuantham sulhnu a nei lo.

City director of football Txiki Begiristain chuan, "A game thlir dan, a ball pass thiam dan, a phurna leh thathona hian player ṭha takah a siam a, hnehna chan duh tlat player a ni bawk.

"Kan squad tiṭha lehzual tur player-ah kan ngai a, kan game pawh tun aia ṭha lehzual zawk a nih theih kan beisei," a ti a, beiseina a nei sang hle.

Phillips chuan, "Pep-a hnuaia khelh a, amah leh a coaching staff-te hnuaia inzirna chance ka nei hi ka lawm takzet a, hetiang ang squad ropuia ka awm ve thei hi ka hlim hle," a ti.

Leeds aṭanga inzir chhuak Phillips hian Leeds tan chiah a la khel a, season hman zawh takah khan Leeds tan inelna hrang hrangah match 23 khelin goal khat leh assist vawi khat a nei.

Kum 2015 khan Leeds tana a match hmasa ber khelin, match 233-ah goal 13 khungin assist 14 a nei a, Leeds fan-te thlahna thu ziakin, amah chher hriamtu Bielsa a hre reng a, Phillips chuan, "Club tan i theihna zawng zawng i hlan piahlamah, vawiina ka thlen chin thleng tura ka mamawh zawng zawng chu min pe a ni," a ti.

Phillips chuan, "Naupang ka nihna angin duhthusam tam tak ka nei ṭhin a, tun thleng pawhin ka la nei - mahse, he team tana ka khel ve thei kha ka theihnghilh ngai loh tur chu a ni," a ti a, City-a pan chu Leeds fan-ten an hriatthiam a beisei thu a sawi.

Hetihlai hian Leeds hian City aṭangin midfielder Darko Gyabi an lalut ve thung a, kum 18 mi hi kum li atan contract an ziahpui - a man zat tarlan a ni lo.