Real Madrid tan vawi khat chak a tawk ta
Spanish champion ni turin Real Madrid tan vawi khat chak chiah a ngai tawh a, Barcelona result ngaihven tel a ṭul tawh lo - an kutah engkim a innghat.
Real Madrid hian Thawhṭanni zan khan an mikhualna ramah Granada chu 2-1 in an hneh a, Ferland Mendy leh Karim Benzema ten goal khat ve ve an khung. Zinedine Zidane-a naute hian Villarreal leh Leganes an la hmachhawn dawn a, fixture en mai chuan Real tan champion hi thil harsa ni tura ngaih a ni tawh lo.
Real hian Ningani zan dar 12:30-ah Villarreal an mikhual dawn a, Barcelona chuan Ningani zan dar 12:30-ah vek Osasuna an mikhual bawk ang. Match hnih ve ve khelh tur an la neihah Barca hian point liin Real hi an phak lo mek.
Inkhel chu
Real Madrid-in inkhel ṭan aṭanga minute 10-na lekah rin loh lam aṭangin goal an nei a, France defender Ferland Mendy chuan angle chep tak kar aṭangin an goal hmahruai hi a khung.
Minute ruk a liam a, Real bawkin goal an khung. Madrid tana France hnathawh ṭhat zan a ni a, Mendy ang thoa France mi Karim Benzema chuan an goal hnihna hi a rawn khung - tun season league match 35-a khelha goal 19-a khungna a ni.
Real hi awlsam takin an chak mai dawn niin a lang hman a, mahse a ni lo. Granada tan Darwin Machis chuan Thibaut Courtois-a kap karah si phurh a rawn sut ṭhen a, minute 50 chiah a la liam.
Hun tawp lamah Barca lawmna siam turin Ramon Azeez chuan a khung ngei dawn niin a lang hman a, mahse Sergio Ramos chuan goal line aṭangin a pet chhuak hman. Real an vannei a, Barca an indawm kun.
A hnai zel
Real hi Barcelona aia head-to-head a an ṭhat zawk avangin a nihna takah chuan champion turin point hnih chauh an mamawh tawh - an match hnuhnung pahnihah an draw ve ve pawhin an champion dawn tihna a ni.
Zidane chuan, "Hlim takin kan awm phawt ang a, zaninah chuan Ningani zana kan inkhel tur atan kan chawl hahdam phawt ang. Thawhlehniah kan training lehnghal ang a, Ningani zana khelmual rap leh turin kan inpeih dawn a ni," a ti.
Hetihlai hian Real tan Mendy-a'n goal a khung chiah khan tun season La Liga-ah Madrid khaw club tan hian player 21 zetin goal an khung tawh tihna a ni nghal - hei hi Real squad chhah ṭhatzia pholanna a ni bawk. Real Madrid-a a season hmasa ber hmangtu Mendy hian tun season La Liga-ah match 23 a khel tawh a, a goal khung kha Lyon aṭanga Real a pan hnua Madrid jersey nena a khung hmasak ber a ni.