Everton defender thar Tarkowski
Premier League club Everton chuan Burnley centre back James Tarkowski chu free transfer-in an lalut a, kum 29 mi defender hian Goodison Park-ah kum li chhung hun hmang turin contract a ziak.
Burnley-a kum ruk leh a chanve zet hun hmang tawh Tarkowski hian June thla khan Premier League aṭanga tla hlim club-ah hian a contract chu a hmang zo a, an relegate hma khan Burnley a chhuahsan tur thu hi a tichiang tawh a ni.
Tarkowski chuan, "Beiseina sang tak neitu ka ni a, hlawhtlinna sang tak chan a, nomawi chawi ka duh a, ka he hmunah hian hlawhtlinna chhar turin ka lo kal a ni," a ti.
England tana vawi li inlan tawh defender hi club tam takin lakluh an duh a, Steven Gerrard enkawl Aston Villa pawh an langsar hle. Mahse, a tawpah Frank Lampard-a enkawl team lama kal a thlang ta zawk.
Tarkowski chuan, "Manager titipui hi chuan, a player-te aṭanga a thil duh leh keimahnia a beisei, eng vanga min lakluh duh nge a nih, tih hriatchian tel hi a ṭul ṭhin.
"Lampard hian ka chakna a hrechiang a, a ruahmannaa ka tel ve theih dan tur a hmu lawk a, team pawh hma ka sawnpui theih a biesei. Ka mizia leh hruaitu ka nihna thlengin a hmu a, he team tana ka thawhhlawk turzia a hmu thiam a ni," a ti.
Everton's director of football Kevin Thelwell chuan, "Statistic en ila, tun hnai kum chhungin Tarkowski hi Premier League defender rin hlawh ber pawl a ni tih kan hmu thei a ni," a ti.
Tarkowski hian February 2016 khan Burnley hi a zawm a, hetihlai hian Championship la khel mah se hemi season-ah vek hian Premier League an inpetkai nghal.
Premier League-a season ruk hun a hman chhung hian league match 194 khelin goal sarih a khung a, assist vawi nga a nei bawk.
Hetihlai hian Everton hian an thiampuipa Richarlison chu Tottenham Hotspur hnenah pound maktaduai 60 bawr velin an hralh a, he thu buatsaih a nih lai hian a thlakna tur an la lalut lo.
Toffees (Everton sawina) hian August 6-ah Premier League season an ṭan dawn a, an match hmasa ber chu zan dar 10:00-ah Chelsea nen an khel ang - hna a hautak nghal dawn hle.