Gareth Bale a hahdam?

Real Madrid inkhel boruak karah Gareth Bale-a'n chanchin a lo nei ve leh a, Welsh forward hian bench-a a ṭhutnaah a kut pahnih chu a mit zawnah dahin 'en tlang' lem a siam vel!

Kar khata £350,000 hlawh mek forward hi Alaves laka an chak ṭum khan bench-ah a mutthlu tawh bawk a, Zinedine Zidane-a'n substitution tawp ber a siamin a lo nui bawk. Mahse, Zidane chuan, "Bale-a awm danah sawisel tur ka nei lo. Kan duhah kan chiang tlang a, league nomawi chawi ngei tura kan hmabak match hniha chak chiahin kan rilru a luah a ni," a ti. Kum 2013-a Real zawmtu Bale hian tun season La Liga-ah match 12 chiah inkhel bul a ṭan a, June 24-a Mallorca 2-0 a an hneh hnu khan Real tan a inlan leh tawh rih lo.