Windies-in England an hneh

England leh West Indies ten July 8-12 inkar khan Test match vawi thum an khelh tura hmasa ber chu Ageas Bowl, Southampton-ah an khel a, mikhual Windies-in wicket liin hnehna an chang.

Ṭhumvawrah England an vannei a, vuak hmasak an thlang. Ben Stokes captain-na hnuaia khel England team-in Windies bowler te an ngam lo a, run 204 chauh an siam. Run siam tam ber Stokes pawhin run 43 chauh a vaw chhuak.

Windies captain Jason Holder-a'n wicket ruk (42/6) a la, Shannon Gabriel-a'n wicket li (62/4) a la ve bawk. Mikhual team hian first innings-ah opener Kraigg Brathwaite (65) leh wicketkeeper Shane Dowrich (61) te hmangin run 318 an siam.

Second innings-ah England insiamṭha hretin run 313 an siam a, amaherawhchu Windies tan Gabriel bawk a che ṭha - wicket nga (75/5) a la. Second innings-ah West Indies an talbuai a, Jermaine Blackwood-a'n run 95 siamin a rawn chhan chhuak.

Windies-in second innings-ah run 200 siamin wicket ruk an hloh a, mikhual team hian England wicket liin an hneh. Second Test hi July 16-20 chhung hian Old Trafford-ah an khel leh ang.