Lalpa'n thil ropui min tihsak e ; India ram champion Mizo club

Football-ah thilmak a thleng tawh ṭhin a, season liam ta khan Premier League-ah mak danglam takin Leicester City an champion. Tunah chuan Mizoramin Foxes champion dan ang thoa ropui an tem ve ta, India ram champion chu Aizawl FC an ni. Shillong-ah Mizo mipuiin 'Lalpan thil ropui min tihsak e' tih hla sain an zai ruai dual dual a, Mizoram lam aṭangin rilru leh thinlung takin an lo zawm bawk.

Pathianni zan khan Aizawl FC chuan NorthEast-a I League hmasa ber khelhna hmun Meghalaya khawpui Shillong-ah Lajong chu 1-1 in an draw a, point khat hi champion tura Mizo club mamawh zat a ni. Kolkata-ah Mohun Bagan-in an mikhual Chennai City 2-1 in lehthal mah se 2015 I League champion Mariners pa­hnihnaah an lungawi a ṭul tawh. NorthEast club zinga I League champion hmasa ber chu Mizo club Aizawl FC an ni.

Mizo club captain Mizo
I League tawp zanah Aizawl FC-in captain Alfred Kemah Jaryan an chhawr thei lo a, Mizo club tana captain armband hreng chu Mohun Bagan laka chakna goal khungtu Zohmingliana Ralte a ni.

Liberian midfielder Alfred aiah hian Mizo tlangval V. Lalṭanpuia'n inkhel bul a ṭan a, hrem vang thoa khel thei lo Ashutosh Mehta aiah Lalruatthara a lut bawk. Zan pawimawhah Aizawl FC tan Mizo pariatin inkhel bul an ṭan a, tun season-a Mizo player-in AFC tana inkhel bul ṭan an tam ber ṭum a ni.

Kolasib tlangval William
Aizawl FC-in inkhel bul ṭan ṭha mah se minute 9-na lekah Aser Dipanda Dicka hmangin Lajong-in goal an khung a, Mizo club a ṭhawng hle.

Lajong tan Samuel Lalmuanpuia leh Isaac Vanmalsawma chu player pawimawh an ni a, Mizo club-in goal venhim aiin goal nawr ngai pawimawh mah se awmze neiin an nawr hleithei lo.

Mizo club vanduai zan niin a lang hman. Ivorian forward Bayi Kamo Stephane goal khung tur chu goalline aṭangin petchhuah a ni a, R. Laldanmawia goal khung chu pawm a ni lo bawk. Amaherawhchu second half ṭantirhah William Lalnunfela a rawn lut - Kolasib tlangval hian tun season-ah vawi khatmah inkhel bul ṭan lo mah se Mizoram Premier League-ah Chanmari FC leh Aizawl FC champion pui tawhin Santosh Trophy leh National Games-ah a champion tawh bawk.

Minute 67-naah William-a hian Lalramchullova freekick pet chu a vawi khat tauhnaah goal ban tauh per nan hmang mah se a per let chu chiang takin a pet goal. Kolasib tlangval hian tun season-ah minute 129 chauh inlanin goal khat chauh khung mah se a goal khung hi Mizo club champion-na a ni.

An lam e
Shillong Lajong-in goal khat an khung hnuah pawh JN Stadium-a Mizo mipui pungkhawmin 'Lalpan thil ropui min tihsak e' tiin an zai rual dual dual tawh a, inkhelh ban thlengin he hla ropui hi an sa zel.

Goal a luh chiah khan Shillong-ah chauh ni loin Mizoram puma TV kal­tlanga entute thawm a ṭha a, Mizo club tan Mizo mipuiin an theihna zawng zawng an chhuah. Khelmual chhungah player-te an tlawm duh lo bawk a, nomawi an sual chhuak ta.

JN Stadium-a mipui pungkhawm hi mi 23,700 anga chhut a ni a, tun season-a Lajong khelmuala mipui punkhawm tam ber ṭum a ni.

Tlai dar 5:00-ah PasalṬha hmuahna
Lammualah vawiin tlai dar 5:00 hian I League cham­p­ion Aizawl FC hmuah­­na Mizoram Foot­ball Associa­tion-in a buatsaih dawn. Mizo club hian tlai dar 3:00-ah Lengpui an rawn thleng ang a, Mizoram sorkarin chawhnu chawlh a puan bawk avangin AFC hlawhtlinna lawmpuitu zawng zawng tan chuan Lengpui aṭanga hmuah theih hi duhthusam a ni.

MFA-in Lammuala Ai­zawl FC puala hun hlimawm tak a buatsaih turah hian Mizo tawh phawt chu KAWR SEN nen kal ve mai tur a ni.